புதுடெல்லி: சட்டவிரோத பணப்பரிவர்த்தனை தொடர்பான விவகாரத்தில் இதுவரையில் எத்தனை வழக்குகள் முடிவடைந்துள்ளன என்று அமலாக்கத்துறைக்கு உச்ச நீதிமன்றம் கேள்வி எழுப்பியுள்ளது. சட்டவிரோத பணப் பரிமாற்ற தடுப்புச் சட்டத்தின் கீழ் அமலாக்கதுறையால் கைது செய்யப்படும் வழக்குகளில் நீண்ட வருடங்களாக சிறையில் இருக்கும் பல்வேறு வழக்குகளில் தொடர்புடையவருக்கு உச்ச நீதிமன்றம் அடுத்தடுத்து ஜாமீன் வழங்கி வருகிறது. இந்த நிலையில் சட்டவிரோத பணப்பரிமாற்ற தடுப்புச் சட்டத்தின் கீழ் கைது செய்யப்பட்ட ஒருவர், வழக்கில் இருந்து தனக்கு ஜாமீன் வழங்க வேண்டும் என்று உச்ச நீதிமன்றத்தில் மனு தாக்கல் செய்திருந்தார்.
குறிப்பாக கடந்த 2023ம் ஆண்டு தான் கைது செய்யப்பட்டிருந்த நிலையில் தொடர்ந்து விசாரணை காவலில் உள்ளதாகவும் மனுவில் கோரிக்கை வைத்திருந்தார். இதையடுத்து மேற்கண்ட மனுவானது உச்ச நீதிமன்றத்தில் நீதிபதிகள் உஜ்ஜல் புயான் மற்றும் அபய் எஸ் ஓகா ஆகியோர் அமர்வில் நேற்று விசாரணைக்கு வந்தபோது பிறப்பித்த உத்தரவில்,\\”நீண்ட வருடங்களாக விசாரணை காவலில் சிறையில் உள்ள நிலையில் மனு தாக்கல் செய்திருந்த நபருக்கு ஜாமீன் வழங்கப்படுகிறது என்று தெரிவித்த நீதிபதிகள் அமலாக்கத்துறைக்கு சரமாரி கேள்விகளை எழுப்பினர்.
அதில்,\\” சட்டவிரோத பண பரிமாற்றம் தடுப்புச் சட்டத்தின் கீழ் இதுவரை எத்தனை வழக்குகள் முடிக்கப்பட்டுள்ளது?. அதேப்போன்று எத்தனை வழக்குகளில் தண்டனை வழங்கப்பட்டுள்ளது என்பதை அமலாக்கத்துறை ஒரு நாள் கண்டறிய வேண்டும் என்று தெரிவித்தனர். இதில் கடந்த ஆகஸ்ட் மாதம் இது போன்ற வழக்கு ஒன்றில் உத்தரவு வழங்கும்போது சட்டவிரோத பண பரிமாற்ற தடுப்புச் சட்டத்தின் கீழ் பதிவு செய்யப்பட்ட பத்தாயிரம் வழக்குகளில், கடந்த 10 ஆண்டுகளில் 40 வழக்குகளுக்கு மட்டுமே தண்டனை கிடைத்துள்ளது என உச்ச நீதிமன்றம் அமலாக்கத்துறைக்கு கண்டனம் தெரிவித்திருந்தது.
The post பணப்பரிமாற்றம் தொடர்பான விவகாரத்தில் எத்தனை வழக்குகள் முடிக்கப்பட்டுள்ளது ? அமலாக்கத்துறைக்கு உச்ச நீதிமன்றம் சரமாரி கேள்வி appeared first on Dinakaran.
