விருதுநகர், நவ.18: விருதுநகரில் நேற்று அதிகாலை ஏற்பட்ட தீ விபத்தில் டீக்கடை மற்றும் சிஐடியு அலுவலகம் எரிந்து நாசமானது. விருதுநகரில் சிவகாசி சாலையில் முனியசாமி என்பவருக்குச் சொந்தமான டீக்கடை உள்ளது. இந்த கடையை ஒட்டியுள்ள கட்டிடத்தின் மாடியில் சிஐடியு அலுவலகம் கூரை ஷெட்டில் இயங்கி வந்தது. நேற்று முன் தினம் இரவு வழக்கம்போல டீக்கடையை உரிமையாளர் பூட்டிவிட்டு சென்றார். இந்நிலையில் நேற்று அதிகாலை டீக்கடை திடீரென தீப்பிடித்து எரிந்தது.
சிறிது நேரத்தில் சிஐடியு அலுவலக கூரையிலும் தீ பரவியது. இதுகுறித்து தகவல் அறிந்த விருதுநகர் தீயணைப்பு நிலைய வீரர்கள் விரைந்து வந்து தீயை அணைத்தனர். இருப்பினும், டீக்கடை, சிஐடியு அலுவலக கூரைசெட் ஆகியவை முற்றிலும் எரிந்து சாம்பலானது. அலுவலகத்தில் இருந்த ஆவணங்கள் கருகின. டீக்கடை அடுப்பில் நெருப்பை சரிவர அணைக்காமல் சென்றதே விபத்துக்கு காரணம் என கூறப்படுகிறது. இதுகுறித்து விருதுநகர் பஜார் காவல் நிலைய போலீசார் விசாரணை நடத்தி வருகின்றனர்.
The post விருதுநகரில் தீ விபத்தில் சிஐடியு அலுவலகம் சேதம் appeared first on Dinakaran.
