- ஆலங்குடி
- புதுக்கோட்டை
- அப்துல் ஜபார்
- கீரமங்கலம் மேற்குப் பேட்டை
- ஆலங்குடி தாலுக்கா, புதுக்கோட்டை மாவட்டம்
*இழப்பீடு வழங்க கோரிக்கை
புதுக்கோட்டை : ஆலங்குடி அருகே தோட்டத்தில் மேய்ந்த ஆடுகளை நாய்கள் கடித்து குதறியது. இதில் 9 ஆடுகள் பலியானது.புதுக்கோட்டை மாவட்டம் ஆலங்குடி தாலுகா கீரமங்கலம் மேற்கு பேட்டை பகுதியை சேர்ந்தவர் கூலி தொழிலாளி அப்துல் ஜபார். இவரது மனைவி பிச்சையம்மாள்(35). தனது குடும்ப வருமானத்திற்காக கடந்த ஒரு வருடமாக 9 செம்மறி ஆட்டுக்குட்டிகளை வாங்கி வளர்த்து வருகிறார். பகல் நேரங்களில் வயல்வெளியில் மேய்ச்சலுக்கு ஓட்டி சென்று இரவில் வீட்டில் கட்டி வைத்துள்ளார்.
நேற்று காலை அதே பகுதியில் உள்ள கம்பிவேலி போடப்பட்ட தனது தோட்டத்திற்குள் புல் அதிகமாக இருந்ததால் ஆடுகளை தோட்டத்திற்குள் மேய்ச்சலுக்கு விட்டுவிட்டு தோட்டத்தின் கேட்டை சாத்திவிட்டு வீட்டிற்குச் சென்றுவிட்டார். மதியம் ஆடுகளை பார்க்க வந்தவர் தோட்டத்தில் ஆடுகளை காணாமல் தேடிய போது தோட்டம் முழுவதும் தோல் கிழிந்து, குடல் வெளியே வந்த நிலையிலும் ஆங்காங்கே ஆடுகள் இறந்தும், சில ஆடுகள் உயிர் போகும் நிலையில் துடித்துக் கொண்டும் கிடந்ததை கண்டு அதிர்ச்சி அடைந்தார்.
பிச்சையம்மாள் தோட்டத்திற்குள் நுழைவதை பார்த்து ஆடுகளை கடித்து கொண்டிருந்த நாய்கள் ஓடிவிட்டது. தான் கடன் வாங்கி ஆட்டு குட்டிகளாக வாங்கி வளர்த்த அத்தனை ஆடுகளையும் நாய்கள் கடித்துக் கொன்ற விட்டதே இனி எப்படி கடனை கட்டுவேன் என்று பிச்சையம்மாள் கதறி அழுதது அனைவரையும் கலங்க வைத்தது. சம்பவ இடத்திற்கு வந்த கீரமங்கலம் தெற்கு கிராம நிர்வாக அலுவலர் விசாரனை செய்தார். கால்நடை மருத்துவர் செல்வராஜ் சம்பவ இடத்திலேயே பிரேதப் பரிசோதனை செய்தார். 9 ஆடுகளையும் நாய்கள் கடித்துக் கொன்றது. எனவே பிச்சையம்மாள் குடும்பத்திற்கு அரசு இழப்பீடு வழங்க வேண்டும் என்று கோரிக்கை எழுந்துள்ளது.
The post ஆலங்குடி அருகே நாய்கள் கடித்து குதறியதில் 9 ஆடுகள் சாவு appeared first on Dinakaran.
