கொழும்பு: இலங்கை யு19 அணியுடனான 2வது டெஸ்டில், 211 ரன் வித்தியாசத்தில் அபாரமாக வென்ற இந்தியா யு19 அணி 1-0 என்ற கணக்கில் தொடரைக் கைப்பற்றியது. பிரேமதாசா அரங்கில் நடைபெற்ற இப்போட்டியின் முதல் இன்னிங்சில் இந்தியா யு19 அணி 411 ரன் குவித்த நிலையில் இலங்கை யு19 அணி 148 ரன்னில் ஆல் அவுட்டானது. 263 ரன் முன்னிலையுடன் 2வது இன்னிங்சை விளையாடிய இந்திய இளைஞர் அணி 3 விக்கெட் இழப்புக்கு 208 ரன் குவித்து டிக்ளேர் செய்தது.
இதையடுத்து,472 ரன் எடுத்தால் வெற்றி என்ற இமாலய இலக்குடன் களமிறங்கிய இலங்கை யு19 அணி, 3ம் நாள் ஆட்ட நேர முடிவில் 4 விக்கெட் இழப்புக்கு 155 ரன் எடுத்திருந்தது. கை வசம் 6 விக்கெட் இருக்க, இலங்கை யு19 அணி வெற்றிக்கு இன்னும் 317 ரன் தேவை என்ற நிலையில், கேப்டன் விமத் தின்சரா 55 ரன், கவிஜா கமகே 1 ரன்னுடன் நேற்று கடைசி நாள் ஆட்த்தை தொடங்கினர். தின்சரா 64 ரன், துல்னித் 15, ஜேசன் பெர்னாண்டோ (0) அடுத்தடுத்து வெளியேறினர்.
ஓரளவு தாக்குப்பிடித்த கமகே 36, செத்மிகா 42 ரன்னில் பெவிலியன் திரும்பினர். இலங்கை யு19 அணி 76.5 ஓவரில் 260 ரன்னுக்கு அனைத்து விக்கெட்டையும் பறிகொடுத்தது. இந்தியா யு19 பந்துவீச்சில் ரோகித் யாதவ் 4, சிகுருபதி வேங்கடா 3, ராகவேந்திரா, ஜெகந்நாதன், யஷ்பர்தன் தலா 1 விக்கெட் வீழ்த்தினர். 211 ரன் வித்தியாசத்தில் அபாரமாக வென்ற இந்திய இளைஞர் அணி 1-0 என்ற கணக்கில் தொடரை கைப்பற்றியது.
