சென்னை: ஆரம்பம் முதலே நீட் தேர்வுக்கு திமுக எதிர்ப்பு தெரிவித்து வருகிறது. அதனை முழுமையாக ரத்து செய்ய வேண்டும், என திமுக தலைவர் மு.க.ஸ்டாலின் தெரிவித்துள்ளார். இது தொடர்பாக அவர் வெளியிட்டுள்ள எக்ஸ்தள பதிவு: புதுடெல்லியில் மாணவர்களின் போராட்டம் நாடு முழுவதும் கவனத்தை ஈர்த்துள்ளது. நீட் பெருமளவிலான முறைகேடுகளை அனுமதிப்பதற்காகவே வடிவமைக்கப்பட்டது என்பதை எச்சரிக்கும் முதல் குரல் நாங்கள்தான். அதனால்தான் திமுக ஆரம்பம் முதலே நீட் தேர்வுக்கு எதிர்ப்பு தெரிவித்து, அதன் ஆபத்துகளை தொடர்ந்து சுட்டிக்காட்டி வருகிறது.

சமூக நீதிக்காக இந்தியாவுக்கு வழிகாட்டிய தமிழ்நாடு, முதல் அரசியல் சட்டத் திருத்தத்திற்கு வித்திட்ட மாநிலம், இப்போது ஒரே ஒரு கோரிக்கையை மட்டுமே முன்வைக்கிறது. நீட் ஒழித்துக் கட்ட வேண்டும் (Abolition Of NEET). இந்த போராட்டங்களில் வேறு எந்தக் கோரிக்கையையும்விட, நீட் ஒழிப்பதே மையமாக இருக்க வேண்டும். நீட் முழுமையாக ரத்து செய்தால்தான் இந்தப் பிரச்னைகளுக்கு நிரந்தர தீர்வு கிடைக்கும். இவ்வாறு அவர் குறிப்பிட்டுள்ளார்.