தண்டராம்பட்டு அருகே பட்டப்பகலில் பரபரப்பு அண்ணன், தம்பி வீடுகளில் 7 சவரன் தங்க நகை, ரூ.1.60 லட்சம் திருட்டு

*மர்ம ஆசாமிகளுக்கு வலை

தண்டராம்பட்டு : திருவண்ணாமலை மாவட்டம் தண்டராம்பட்டு அடுத்த ராயண்டபுரம் கிராமத்தை சேர்ந்தவர் சிவராமன். இவருக்கு 2 மகன்கள் உள்ளனர். இவர்கள் இருவருக்கும் திருமணமாகி தனித்தனியாக வசித்து வருகின்றனர். அதில் மூத்த மகன் பிரகாஷ்(45), ஜேசிபி ஆபரேட்டர். இளைய மகன் வாசு(42), ஹிட்டாச்சி ஆபரேட்டராக உள்ளார். இவர்கள் இருவரும் ஒரே இடத்தில் தனித்தனியாக வீடுகளை கட்டி குடும்பத்துடன் வசித்து வருகின்றனர்.

இந்நிலையில் நேற்று காலை பிரகாஷ் மற்றும் வாசு ஆகியோர் தங்களது குடும்பத்துடன் வீட்டை பூட்டிவிட்டு கோயிலுக்கு சென்றனர். இதை நோட்டமிட்ட மர்ம ஆசாமிகள், இருவரின் வீட்டு கதவின் பூட்டை உடைத்து உள்ளே சென்று, வீட்டின் பிரோவில் வைத்திருந்த தங்க நகைகள் மற்றும் பணத்தை திருடி சென்றுள்ளனர். இதையடுத்து அவ்வழியாக சென்றவர்கள் இருவரின் வீடுகளின் கதவுகளின் பூட்டு உடைக்கப்பட்டிருப்பதை பார்த்து, பிரகாஷ் மற்றும் வாசுவிற்கும் தகவல் தெரிவித்தனர்.

அதன்பேரில் சம்பவ இடத்திற்கு வந்த பிரகாஷ் மற்றும் வாசு ஆகியோர் வீட்டின் உள்ளே சென்று பீரோவில் வைத்திருந்த பொருட்களை சரிபார்த்தனர். அதில் பிரகாஷ் வீட்டில் ரூ.1.50 லட்சம் பணம், 3 சவரன் தங்க நகைகள், 500 கிராம் வெள்ளி பொருட்களையும், வாசுவின் வீட்டில் ரூ.10 ஆயிரம் பணம், 4 சவரன் தங்க நகைகள், 250 கிராம் வெள்ளி பொருட்களை மர்ம ஆசாமிகள் திருடிச்சென்றுள்ளனர். இதுகுறித்து இருவரும் தண்டராம்பட்டு காவல் நிலையத்தில் தனித்தனியாக புகார் அளித்தனர்.

அதன்பேரில், இன்ஸ்பெக்டர் பொன்ராஜ், எஸ்.ஐ. சிவகுமார் மற்றும் போலீசார் சம்பவ இடத்திற்கு சென்று விசாரணை நடத்தினர். பின்னர், கைரேகை நிபுணர்கள் வரவழைக்கப்பட்டு, அங்கு பதிவாகியிருந்த கைரேகைகளை பதிவு செய்தனர்.

மேலும், வழக்குப்பதிவு செய்து, அப்பகுதியில் உள்ள சிசிடிவி கண்காணிப்பு கேமரா பதிவுகளை ஆய்வு செய்து, மர்ம ஆசாமிகளை தேடி வருகின்றனர். பட்டப்பகலில் அண்ணன் மற்றும் தம்பி ஆகியோர் வீட்டின் பூட்டை உடைத்து மர்ம ஆசாமிகள் தங்க நகை மற்றும் பணத்தை திருடிச்சென்ற சம்பவம் அப்பகுதியில் பரபரப்பை ஏற்படுத்தியுள்ளது.