சென்னை: பரந்தூர் விமான நிலையத் திட்ட நிச்சயமற்ற சூழலால் அப்பகுதியில் ரியல் எஸ்டேட் தொழில் மந்தமாக உள்ளது. பரந்தூர் பசுமைவெளி விமான நிலையத் திட்டத்தைச் சுற்றி நிலவி வரும் தொடர் நிச்சயமற்ற தன்மைகள் காரணமாக, மேற்கு சென்னை பகுதியின் ரியல் எஸ்டேட் மற்றும் நிலச் சந்தை கடுமையான மந்தநிலையைச் சந்தித்து வருகிறது. கடந்த சில மாதங்களாக நிலங்களின் விலைகள் கணிசமாகக் குறைந்துள்ளதோடு, புதிய முதலீட்டாளர்களின் வருகையும், நிலம் வாங்குவது குறித்த விசாரணைகளும் பெருமளவில் சரிந்துள்ளதாக தரவுகள் தெரிவிக்கின்றன.
விமான நிலையத் திட்டத்தை நம்பி இப்பகுதிகளில் பெரிய அளவில் முதலீடு செய்திருந்த டெவலப்பர்கள் மற்றும் ரியல் எஸ்டேட் நிறுவனங்கள், தற்போது தங்களது விளம்பர உத்திகளை மாற்ற வேண்டிய கட்டாயத்திற்குத் தள்ளப்பட்டுள்ளன. காஞ்சிபுரம் மாவட்டம் சுங்குவார்சத்திரம் அருகே உள்ள புதுப்பட்டு கிராமத்தில், பனியன் ட்ரீ எஸ்டேட்ஸ் நிறுவனத்தின் விளம்பர உத்தி இதற்கு ஒரு சிறந்த உதாரணமாகும். கடந்த மாதம் வரை, பரந்தூர் விமான நிலையத்திற்கு மிக அருகில் இந்த மனை அமைந்திருப்பதைச் சுட்டிக்காட்டி, ‘‘100 சதவீதம் லாப உத்தரவாதம்” என்ற வாக்குறுதியுடன் அந்நிறுவனம் தீவிரமாக சந்தைப்படுத்தி வந்தது. ஆனால், இந்த மாதத் தொடக்கத்தில் இருந்து அந்நிறுவனத்தின் சமூக ஊடக விளம்பரங்கள் எதிலும் ‘பரந்தூர்’ என்ற வார்த்தையே இடம்பெறவில்லை. அதற்குப் பதிலாக, ‘‘சுங்குவார்சத்திரம் அருகே நிலம் வாங்குங்கள்” என்று மட்டுமே பொதுவான விளம்பரங்களை மேற்கொண்டு வருகின்றனர்.
விமான நிலையத் திட்டத்தில் ஏற்பட்டுள்ள சுணக்கம் மற்றும் உள்ளூர் மக்களின் தொடர் எதிர்ப்புகள் காரணமாக, டெவலப்பர்கள் தங்களது திட்டங்களை மறுவடிவமைப்பு செய்து வருகின்றனர். இனி வரும் காலங்களில் விமான நிலையத்தை மட்டுமே நம்பியிருக்காமல், ஸ்ரீபெரும்புதூர் மற்றும் சுங்குவார்சத்திரம் ஆகிய பகுதிகளில் ஏற்கனவே வலுவாக கால்பதித்துள்ள தொழில்துறை வளர்ச்சியை மையமாக வைத்து, தங்களது அடுத்தகட்ட வணிக நகர்வுகளை மேற்கொள்ள கட்டுமான நிறுவனங்கள் திட்டமிட்டுள்ளன. விமான நிலையத் திட்டத்தின் எதிர்காலம் குறித்த தெளிவான அறிவிப்பு அரசுத் தரப்பிலிருந்து வரும் வரை, மேற்கு சென்னை நிலச் சந்தையில் இந்த மந்தநிலை நீடிக்க வாய்ப்புள்ளதாக இத்துறை சார்ந்த வல்லுநர்கள் கருதுகின்றனர்
