புதுடெல்லி: தொகுதி மறுவரையறை மசோதா விவகாரத்தில் தமிழ்நாட்டின் நலனை கருத்தில் கொண்டே திமுக செயல்படும் என்று காங்கிரஸ் கூறியுள்ளது. நாடாளுமன்ற மழைக்கால கூட்டத்தொடர் தொடங்க உள்ள நிலையில் பல்வேறு மசோதாக்களை நிறைவேற்ற பிரதமர் மோடி தலைமையிலான பா.ஜ அரசு நடவடிக்கை எடுத்து வருகிறது. இந்த சூழலில் காங்கிரஸ் பொதுச் செயலாளர் ஜெய்ராம்ரமேஷ் கூறியதாவது: தொகுதி மறுவரையறை மற்றும் அமைச்சர்களை நீக்குவது தொடர்பான அரசியலமைப்புச் சட்டத் திருத்த மசோதாக்களை நாடாளுமன்ற நிகழ்ச்சி நிரலில் சேர்க்காதது வழக்கமான மோடி-ஷா உத்தியின் ஒரு பகுதி. ஏனெனில், அவர்கள் அறிவிப்பதைச் செய்வதில்லை, ஆனால் அறிவிக்காதவற்றையே செய்கிறார்கள்.

இந்தக் கூட்டத்தொடரில் ‘ஒரே நாடு, ஒரே தேர்தல்’ தொடர்பான 129-வது அரசியலமைப்புச் சட்டத் திருத்த மசோதாவைக் கொண்டு வருவார்களா என்பது எனக்கு உறுதியாகத் தெரியவில்லை. அவர்கள் அதை குளிர்காலக் கூட்டத்தொடரில் கொண்டு வரலாம்; ஆனால் இந்தக் கூட்டத்தொடரில், (அமைச்சர்கள் மற்றும் முதலமைச்சர்களை) பதவி நீக்கம் செய்வது தொடர்பான 130-வது அரசியலமைப்புச் சட்டத் திருத்த மசோதாவை எவ்வித எதிர்ப்பையும் பொருட்படுத்தாமல் வலுக்கட்டாயமாக நிறைவேற்ற அவர்கள் முயற்சிப்பார்கள் என்பதில் எனக்கு எந்தச் சந்தேகமும் இல்லை.

கடந்த ஏப்ரல் 17 அன்று மூன்றில் இரண்டு பங்கு பெரும்பான்மையைப் பெற முடியாமல் உள்துறை அமைச்சர் அமித்ஷா அவமானகரமான தோல்வியைச் சந்தித்த பிறகு, தொகுதி மறுவரையறை தொடர்பான 131-வது அரசியலமைப்புச் சட்டத் திருத்த மசோதா மறுவேலை செய்யப்பட்டு திருத்தப்பட வேண்டும். எனவே, அந்த இரண்டு மசோதாக்களையே நாங்கள் எதிர்பார்க்கிறோம், அதற்கான தயாரிப்புகளிலும் ஈடுபட்டுள்ளோம். தொகுதி மறுவரையறை தொடர்பான அரசியலமைப்புத் திருத்த மசோதாவை திமுக மற்றும் ஆம் ஆத்மி உள்ளிட்ட ஒட்டுமொத்த எதிர்க்கட்சிகளும் எதிர்ப்பார்கள் என்று எனக்கு நம்பிக்கை உள்ளது.

அதேவேளையில் திரிணாமுல் மற்றும் சிவசேனா (உத்தவ்) கட்சிகளில் ஏற்பட்ட பிளவுகளால் எதிர்க்கட்சிகளுக்குப் பின்னடைவு ஏற்பட்டுள்ளது. திமுக மற்றும் பாஜவின் கருத்துகளிலும் மனநிலையிலும் ஒருமித்த போக்கு உருவானதைக் காட்டும் வகையில் எதுவும் நடக்கவில்லை. கொள்கை மற்றும் மனநிலை அடிப்படையில் அவர்கள் அடிப்படையில் ஒருவருக்கொருவர் எதிரானவர்கள் என்று நான் கருதுகிறேன். இருப்பினும் தமிழ்நாட்டு நலனை கருத்தில் கொண்டு திமுக முடிவு எடுக்கும் என்று நம்புகிறேன். இவ்வாறு தெரிவித்தார்.

அனைத்து பல்கலைக்கழகங்களையும் கட்டுப்படுத்த மோடி முயற்சி
ஜெய்ராம் ரமேஷ் கூறுகையில்,’ நாடாளுமன்ற கூட்டத்தொடரில் கொண்டுவரப்பட உள்ள பட்டியலில் விக்சித் பாரத் சிக்ஷா அதிஷ்டான் மசோதா உள்ளிட்ட சர்ச்சைக்குரிய பிற மசோதாக்களும் உள்ளன. அவற்றை ேதசிய ஜனநாயக கூட்டணியில் உள்ள தெலுங்கு தேசம் கட்சி உள்ளிட்ட பல கட்சிகள் கூட எதிர்த்துள்ளன. மாநில அரசுகளால் நடத்தப்படும் பல பல்கலைக்கழகங்கள் உள்ளன. ஆனால் இதன் கீழ், இனி அனைத்துப் பல்கலைக்கழகங்களும் ஒன்றிய மோடி அரசின் கட்டுப்பாட்டிற்குள் கொண்டுவரப்படும். இது மோடி அரசாங்கத்தின் அரசியலமைப்பு வரம்பை மீறிய செயலாகும்; இதில் பல தீங்கான அம்சங்கள் உள்ளன. ஐஐடி, ஐஐஎம் மற்றும் பல உயர்தர கல்வி நிறுவனங்கள் கூட இந்த மசோதாவின் விதிகளை எதிர்த்துள்ளன’ என்றார்.

தமிழ்நாட்டில் எங்கள் முடிவால் பின்னடைவு ஏற்பட்டது
தமிழ்நாட்டில் தேர்தல் முடிவுக்கு பிறகு திமுக கூட்டணியில் இருந்து விலகி முதல்வர் விஜய் தலைமையிலான தவெக கூட்டணி அரசில் இணைந்தது குறித்து ஜெய்ராம்ரமேஷ் கூறுகையில்,’ நாங்கள் எடுத்த முடிவால் பின்னடைவு ஏற்படவில்லை என்று சொல்வது முட்டாள்தனமாக இருக்கும். ஆம், நிச்சயமாக இது ஒரு பின்னடைவுதான். இது தவிர்க்கப்பட்டிருக்கக்கூடிய ஒரு பின்னடைவுதான். ஆனால் ஏதோ ஒரு காரணத்திற்காக, சில சூழ்நிலைகள் மற்றும் கட்டாயங்கள் காரணமாகத் தமிழ்நாட்டில் ஒரு குறிப்பிட்ட முடிவை எடுக்க வேண்டியிருந்தது, அதற்கு அதற்கே உரிய தர்க்கரீதியான காரணமும் இருந்தது. அது திமுகவின் அணுகுமுறையைப் பாதித்தது.

இருப்பினும் தற்போது திமுக தலைவர் மு.க. ஸ்டாலின் வெளியிட்ட அறிக்கை ஒன்றை நான் பார்த்தேன்; அதில், ெதாகுதி மறுவரையறை மசோதா வரும் வரை காத்திருந்து பார்ப்போம் என்று அவர் கூறியுள்ளார். இது ஒரு நியாயமான கோரிக்கை. முதலில் அந்த மசோதாவில் என்ன இருக்கிறது என்று பார்ப்போம்; உள்துறை அமைச்சர் என்னென்ன விதிகளை அல்லது திருத்தங்களை முன்மொழியப் போகிறார் என்பது நமக்குத் தெரியாது. கடந்த முறை அவர் எதிர்க்கட்சிகள் பலவற்றிற்கும் சில வாக்குறுதிகளை அளித்திருந்ததை நினைவுகூர வேண்டும். ஆனால், தோல்வியடைந்த அரசியலமைப்புச் சட்டத் திருத்த மசோதாவில் அந்த வாக்குறுதிகள் எதுவும் இடம்பெறாததால், அவர் அவற்றை நிறைவேற்றவில்லை.

தற்போது காங்கிரஸ் மீது திமுக சற்று அதிருப்தியில் உள்ளது; நாடாளுமன்றத்தில் தனி இருக்கை வசதிக்கும் அது கோரிக்கை விடுத்துள்ளது. இருப்பினும், தற்போது நடைபெற்று வரும் அரசியல் நகர்வுகள் தமிழ்நாடு உள்ளிட்ட தென்னிந்திய மாநிலங்களின் நலன்களுக்கும், கூட்டாட்சி அமைப்புக்கும், அரசியலமைப்பின் அடிப்படை கட்டமைப்புக்கும் உகந்தவை அல்ல என்பதைச் சரியான நேரத்தில் திமுக உணர்ந்து கொள்ளும் என்று நான் உறுதியாக நம்புகிறேன். சரியான தருணம் வரும்போது, ​​மக்களவையில் அரசால் மூன்றில் இரண்டு பங்கு பெரும்பான்மையைப் பெற முடியாது என்று நான் உறுதியாக நம்புகிறேன். எதிர்க்கட்சிகள் முன் ஒரு சவால் இருந்தாலும், அதில் வெற்றிபெற முடியும் என்ற நம்பிக்கை தங்களுக்கு உள்ளது’ என்றார்.