நன்றி குங்குமம் தோழி

எண்ணம் போல வண்ணம்’, ‘வண்ணம் போல எண்ணம்’ என்று சொல்லலாம். சரியான நிறங்கள் நம் மன ஓட்டத்தை பிரதிபலிக்கும் தன்மை கொண்டவை. சிலர் ஆடைகளை வித்தியாசமான நிறங்களில் தேர்ந்தெடுப்பார்கள். சில உடையின் விலை அதிகமாக இருக்கும். ஆனால், அதன் நிறம் பளிச்சென்று இருக்காது. அதே சமயம் மலிவான புடவை என்றாலும் அதன் நிறத்தினால் பார்க்கவே அழகாகத் தெரியும். எல்லாமே நிறங்களின் மாயம். உடைக்கு எப்படியோ… வீட்டு உள் அலங்காரத்திலும் நிறங்களுக்கு முக்கிய இடம் உண்டு. காற்றோட்டமும், வெளிச்சமும் நன்கு பிரகாசிக்க வேண்டுமானால், அந்த அறையின் நிறக்கூட்டு சரியாக அமைந்திருக்க வேண்டும். அறையிலுள்ள இதர பொருட்கள் கண்களுக்கு விருந்தளிக்கும் வகையில் அமையாவிட்டால், எவ்வளவுதான் செலவு செய்திருந்தாலும் முழுமையான அழகு வெளிப்படாது. விலை மலிவானப் பொருட்கள் கூட நல்லதொரு நிறக்கூட்டில் அமைந்துவிட்டால் விலைஉயர்ந்தது போல காணப்படும்.

புதிய வீடு வாங்கினால், வீட்டிலுள்ள பொருட்கள் அனைத்தையும் புதிதாக வாங்குவார்கள். அப்படி மாற்றினாலும் பரம்பரைப் பொருட்களை பாதுகாப்பார்கள். ஆனால், பொதுவாக வீடுகளில் பொருட்கள் வாங்கும் போது, அறையின் நிறத்தைக் கருத்தில் கொண்டு வாங்க மாட்டோம். பொருட்கள் நன்றாக இருப்பதா என்றுதான் பார்ப்போம். மேலும், அறையின் வண்ணத்திற்கேற்றப் பொருட்களை மாற்றிக் கொண்டே இருக்க முடியாது. அதற்கு பதிலாக அனைத்து வண்ணங்களுக்கு பொருந்தும் பொதுவான நிறத்தில் பொருட்களை தேர்வு செய்யலாம். உதாரணத்திற்கு, வரவேற்பறை வண்ணங்கள் சமையலறைக்கு பொருந்தாது. ஒவ்வொரு அறையின் பயன்பாட்டிற்கு ஏற்பதான் வண்ணங்களை தீர்மானிப்போம்.

ஒரு சில அடிப்படை நிறங்களில், மற்ற வேறு நிறங்களை கலக்கும் போது, அதாவது, பேசிக் நிறமான வெள்ளையுடன் மற்ற நிறங்கள் கலக்கும் போது அது தன்னுள் மற்ற நிறங்களை அடக்கிக் கொள்ளும். மேலும், வெளிர் நிறங்கள் ஒரு இடத்தை விஸ்தாரமாக்கிக் காட்டும். இடம் ஒன்றாக இருந்தாலும் நிறங்களை பொறுத்து அதன் அழகு மாறுபடும். சிலர் ‘ஷேட்’ நிறங்களை விரும்புவார்கள். அதாவது, சிவப்பு, பச்சை, நீலம் போன்ற அடர் நிறங்களை நேரிடையாக பயன்படுத்தாமல், அதனுடன் வெள்ளை நிறத்தை சேர்க்கும் போது அந்த அடர் நிறங்கள் வெளிராக மாறும். அடர் சிவப்புடன் வெள்ளை கலக்கும் போது, ‘ரோஸ்’ நிறமாகும். சிலர் நடுத்தரமான ‘நியுட்ரல்’ வண்ணங்களைவிரும்புவார்கள். கருப்பு, வெள்ளை, பழுப்பு, சாம்பல், பீஜ் போன்றவை. மஞ்சள், ஆரஞ்சு போன்ற நிறங்கள் ‘பளிச்’சென காணப்படுவதால் அவற்றை ‘வாம்’ நிறங்கள் என்பர். நீலம், பச்சை, வயலெட் போன்றவை வெளிர் ‘ஷேட்’ காட்டுவதால் ‘கூல்’ நிறங்கள் என்பர். பொதுவாக வடக்குப் பார்த்த அறைகளுக்கு ‘வாம்’ நிறங்கள் பயன்படுத்தலாம்.

நிறங்கள் ஒவ்வொன்றும் ஒரு அழகுதான். எப்படி பயன்படுத்துகிறோம் என்பதுதான் முக்கியம். காற்றோட்டம் மற்றும் அதிக வெளிச்சம் இல்லாத அறைக்கு சிவப்பு அல்லது ஆரஞ்சு நிறங்களை தேர்ந்தெடுத்தால், அறை மிகவும் சிறியதாகவும், இருட்டாகவும்தான் தெரியும். பொதுவாக ஒரு இடத்திற்குள் நுழையும் போது, மனதுக்கு மகிழ்ச்சி அளித்தால் அங்கு நிறங்கள் சரியாக அமைக்கப்பட்டிருப்பதாக எடுத்துக் கொள்ளலாம். விலையுயர்ந்த வண்ணமயமானப் பொருட்களை காட்சிக்கு வைத்திருந்தாலும், அந்த இடத்தின் நிறத்திற்கும் பொருட்களுக்கும் சம்பந்தம் இல்லாமல் இருக்கும். அந்தஸ்தை காட்டுவதற்காக பல்வேறு வண்ணங்களை தீட்டி, பலப்பல பொருட்களை காட்சியாக்குவது ரசனையில்லாத ஒன்று. ஒவ்வொரு நிறங்களுக்கு சில குணாதிசயங்கள் உண்டு. அதற்கேற்ப நிறங்கள் மற்றும் பொருட்களை அமைக்கலாம்.

வானவில்லின் ஒவ்வொரு நிறங்களும் அற்புதமானவை. நீலம் மற்றும் சிவப்பு சேரும் பொழுது ‘வயலட்’ என்னும் கண் கவர் நிறம் கிடைக்கிறது. அப்படியானால், ஒரு இடத்தில் ‘வயலட்’ பயன்படுத்தினால், நீல வண்ணத்தின் தன்மையும், சிவப்பு நிறத்தின் குணாதிசயமும் கிடைக்கும். அமைதி கிட்டும். சமநிலை ஏற்படும் மற்றும் வளர்ச்சிக்கும் அறிகுறியாக அமையும். கவன சக்தியையும் அதிகரிக்கும் என்பதால் கூட குழந்தைகள் படிக்கும் அறையில் இதனை தேர்வு செய்யலாம். நீல வண்ணம் என்றவுடன் ஆகாயத்தை பார்ப்போம். அதை பார்க்கும் போது மனம் அமைதியாகும். அந்த நிறத்தை பயன்படுத்தும் போதும் நமக்கு அதே எண்ணம் கிடைக்கும். மனம் எதை விரும்புகிறதோ, எதில் நம்பிக்கைக் கிடைக்கிறதோ அதை செயல்படுத்தினால் போதும். எப்பொழுதுமே ‘பாஸிடிவ்’ எண்ணங்களோடு தேர்ந்தெடுக்கும் வண்ணங்கள் நம் மனதிற்கு நல்ல உற்சாகத்தையே தரும். அனைத்து வண்ணங்களுமே அழகுதான் என்றாலும் ஒவ்வொருவருக்கும் பிடித்த நிறம் என்று உண்டு. கருப்பு நிறங்களை பலர் தவிர்ப்பார்கள். சிலருக்கு கருப்பு பிடித்த நிறமாக இருக்கும். அந்த நிறத்தில் ஆடைகள் நிறைய வைத்திருப்பார்கள். காரணம், அவ்வளவு அழகுண்டு கருப்பில். எல்லாமே நம் விருப்பம்தான்.

வீட்டிற்கு ‘வண்ணம்’ தரும் விஷயத்தில் நம் தட்ப வெப்ப நிலையை கருத்தில் கொண்டு அதற்கேற்ற நிறங்களை தேர்ந்தெடுக்கலாம். பனி உறைந்து காணப்படும் குளிர் பிரதேசங்களில் வெதுவெதுப்பாக இருக்க அழுத்தமான நிறங்களை பயன்படுத்துவார்கள். வரவேற்பறையில் ஒரு பக்கம் சிவப்பு, மறுபக்கம் ‘பிரவுன்’ இருக்கும். நம் பிரதேசம் வெப்பம் அதிகம் என்பதால், அதற்கேற்ற நிறங்களை உபயோகிப்பது நல்லது. நிறுவனங்களில் ‘லாபி’ போன்ற இடங்களை அலங்கரிக்க சில அழுத்த நிறங்கள்பயன்படுத்தப்படுகிறது. ஒரு அறை நமக்கு எந்தவித சூழலை ஏற்படுத்த வேண்டும் என்பதை நிச்சயிப்பதில் நிறங்களுக்கு முக்கியப் பங்குண்டு. நம் அறையின் உயரம் அதிகமா அல்லது குட்டை சுவரா என பார்க்க வேண்டும். பொதுவாக மேற்கூரை அலங்காரம் செய்யப்பட்ட அறையின் உயரம் சற்று குட்டையாகத் தோன்றும். அங்கு வெளிர் நிறங்கள் நல்லது. அடுத்து சூரிய வெளிச்சம். ‘ஷேட்’ நிறங்களை பயன்படுத்தலாம். சில ‘பேஸிக்’ நிறங்கள்தான் பல்வேறு வண்ணங்களையும், அதன் கூட்டில் கிடைக்கும் ‘ஷேட்’களையும் உருவாக்குகின்றன. உதாரணத்திற்கு வெளிர் நீலம், சூழலை அமைதியாக்கிக் காட்டும். வெளிர் பச்சை, வெளிர் ரோஸ் போன்றவை படுக்கையறைகளுக்கு பயன்படுத்திக் கொள்ளலாம். நாள் முழுவதும் உழைத்துக் களைத்து ‘அப்பாடா’ என்று சொல்லி ஓய்வெடுக்கும் போது மனதிற்கு இதமான சூழலாக மாற்றும். பச்சை ‘கூல் கலர்’ என்பதால், கண்களுக்கும் குளிர்ச்சியை தரும். பச்சை நிறங்களை பயன்படுத்தவில்லை என்றால் அந்த அறையில் செடிகளை ஆங்காங்கே வைக்கலாம்.

மஞ்சளும், சிவப்பும் சேர்ந்து ஆரஞ்சு வண்ணத்தையும், நீலமும் சிவப்பும் சேர்ந்து வயலட் நிறத்தையும் தருகிறது. எந்த ஒரு முதன்மை நிறங்களுடன் இரண்டாவதாகக் கிடைக்கும் நிறங்களை சேர்க்கும் பொழுது நமக்கு மூன்றாவதாக ஒரு புதிய நிறம் கிடைக்கிறது. ஒவ்வொரு நிறத்தின் ‘லைட் ஷேட்’ வேண்டுமானால், குறிப்பிட்ட வண்ணத்துடன் வெள்ளை கலக்கலாம். உதாரணத்திற்கு வெளிர் பச்சைக்கு, அழுத்தமான பச்சையுடன் வெள்ளை நிறத்தை சேர்க்கலாம். வெள்ளை, கிரே (சாம்பல் நிறம்) பீஜ், பிரவுன் போன்றவை நடுத்தர நிறங்கள். எந்த நிறத்தைப் பயன்படுத்துவது என்ற குழப்பம் இருந்தால் இந்த நிறங்களை பயன்படுத்திக் கொள்ளலாம். எந்தவித வண்ணத்துடனும் நியூட்ரல் நிறங்கள் ஒத்துப்போகும்.

எந்த நிறமுமே ‘இதுதான் சிறந்தது’, ‘இது அழகற்றது’ என்று சொல்ல முடியாது. நம் இடத்திற்கேற்ற சரியான நிறங்களை பார்த்து பயன்படுத்தும் பொழுது அதன் அழகு கூடுகிறது. ‘வாம்’ நிறங்கள் அறையின் தட்ப வெப்பத்தை அதிகரிக்கும். அதுவே ‘கூல்’ நிறங்கள் குறைக்கும். ‘காண்டிராஸ்ட்’ நிறங்கள், அந்தக்கால பழைய வீடுகளில் மேல்பாதி ஒரு நிறமும், கீழ் பாதி மற்றொரு நிறம் என உபயோகப்படுத்தி இருப்பார்கள். சுவற்றில் ஏதேனும் கறைகள் படிந்துவிடும் என்பதற்காக உயரம் பார்த்து வண்ணம் தீட்டியிருப்பார்கள். கோயில்களில் சிவப்பும், வெள்ளையும் மாறி மாறி பட்டை அடித்திருப்பார்கள். இன்று வண்ணம் தீட்ட புதுப்புது யுக்திகள் வந்துவிட்டன. அறையின் ஒரு பக்கம் ‘டெக்சர்’ (Texure) என்று அழுத்தமான நிறத்தில், நமக்குப் பிடித்த நிறத்தை தந்துவிட்டு, மற்ற சுவர்களில் அதன் வெளிர் நிறம் தருகிறார்கள், காலத்திற்கேற்ற மாற்றங்கள் ஏற்பட்டாலும், நிறங்களை பொறுத்து அந்த இடத்தின் அழகு மிளிர்கிறது. சிலர் வீடு முழுவதும் ஒரே வண்ணம் பயன்படுத்துவர். சிலர் ஒவ்வொரு அறைக்கும் ஒரு விதமான நிறத்தை விரும்புவர். குறிப்பிட்ட அறை எதற்கு பயன்படுத்துகிறோம், எப்படிப்பட்ட சூழலை அங்கு உருவாக்க வேண்டுமோ, அத்தகைய சூழலுக்கேற்ற நிறங்கள் தேர்ந்தெடுத்துப் பயன்படுத்தும் போது நமக்கு ஒரு ‘பாஸிடிவ் எனர்ஜி’ கிடைக்கும்.

எத்தகைய அலங்காரமாக இருந்தாலும், சுவரோ, தரையோ நிறத்தைத் தேர்ந்தெடுத்த பிறகு, நம் ‘பட்ஜெட்’டுக்கு ஏற்ற அலங்காரங்களை தரலாம். வீட்டுப் பொருட்கள் வாங்கும் போதே பொதுவான நிறங்களில் வாங்கலாம். இன்றுள்ள ‘தொழில்நுட்ப’ வசதியால் வீடு கட்டிய பின் வீட்டிற்கேற்ற பொருட்களை தேர்ந்தெடுக்கிறார்கள். ‘டிராயிங் ரூமில்’ பர்னிச்சர்கள் பொதுவாக ‘பிரவுன்’ நிறத்தில் இருக்கும். ‘ஷோகேஸ்’ கண்ணாடி மரத்தினால் அமைக்கப்பட்டிருந்தாலும் பரவாயில்லை. தரையின் ‘டைல்ஸ்’ நிறம் ‘டார்க்’ ஆக இருக்குமானால், இவை அனைத்திற்கும் பொதுவாக லைட்ரோஸ், கிரீம், ஹாஃப் ஒயிட் பயன்படுத்தினால் அனைத்தும் அழகாகத் தெரியும். அந்த நிறங்களுக்கேற்ற ‘பிரவுன்’ அல்லது ‘சிவப்பு’ கார்ப்பெட் நல்ல ‘மேட்சிங்’ தரும். ஒவ்வொரு அறையிலும் சுவர் நிறத்தை மட்டும் கருத்தில் கொள்ளாமல் ஏனைய பொருட்களின் வண்ணத்தோடு சேர்த்துப் பார்க்கலாம்.

பொதுவாக வெளிர் நிறங்கள் ஒரு அறையை பெரிது போலக் காட்டும். அதனால் சிறிய அறையாக இருந்தால் வெளிர் நிறங்கள் பயன்படுத்தும் போது ஓரளவு விஸ்தாரமாகத் தெரியும். வரவேற்பறையில் அனைவரையும் கவரக்கூடிய வகையில் வண்ணங்களை தேர்ந்தெடுக்க வேண்டும். தனிப்பட்ட விருப்பங்கள் இருந்தாலும், அடர் நிறங்களை தவிர்க்கலாம். சமையலறையில் மேடை மீது அழுக்குப் படியும் என்பதற்காக, அடுப்பின் பின்புற சுவற்றில் ‘டார்க்’ கலரில் ‘டைல்ஸ்’ ஒட்டியிருப்பார்கள். ‘டைல்ஸ்’ அடர் நிறமாக இருந்தால், அதன் ஷேடில் சுவர் வண்ணம் இருக்கலாம். ‘ஒயிட்’ மற்றும் ‘ஆஃப் ஒயிட்’ சமையலறைக்கு சிறந்தது.

ஆரஞ்சு நிறம் பிரகாசமான நிறமாக இருப்பதால், உற்சாகமான சூழலைத் தரும். அதை ‘லாபி’ மற்றும் குழந்தைகள் அறைக்கு பயன்படுத்தலாம். ‘சிவப்பு’ ‘ஹாட்’ நிறம். தைரியம், சுறுசுறுப்பையும் தரும். ஆனால், உஷ்ணத்தைப் பிரதிபலிக்கும். இன்றைய காலகட்டத்தில், விதவிதமான வண்ணங்களில் வெகு விரைவில் வீட்டையே கூலாக்கிக் காட்டும் சாதனங்கள் வந்துவிட்டன. அடிப்படை கருத்துக்கள் தெரிந்திருந்தால் போதுமானது. மற்றவை அனைத்தும் துறை நிபுணர்களே வழிகாட்டுகிறார்கள். எண்ணத்திற்கேற்ற வண்ணத்தை புகுத்தி மகிழ்வோம்.