லக்னோ: அயோத்தி ராமர் கோயிலில் காணிக்கை மற்றும் நன்கொடைகளை எண்ணும் பணியில் ஈடுபட்டிருந்த ஊழியர்களில் பாதிக்கும் மேற்பட்டோர் ராஜினாமா செய்துள்ளனர். இது பரபரப்பை ஏற்படுத்தி உள்ளது. அயோத்தி ராமர் கோயில் உண்டியல் பணம் மோசடி தொடர்பாக இதுவரை 8 பேர் கைது செய்யப்பட்டுள்ளனர். ராமர்கோயில் அறக்கட்டளையின் பொதுச் செயலாளர் சம்பத் ராய் உள்பட 2 பேர் பதவியில் இருந்து ராஜினாமா செய்தனர்.
உபி அரசு நியமித்துள்ள சிறப்பு விசாரணைக்குழுவினர் தற்போது இரண்டாம் கட்டமாக விசாரணை நடத்தி வருகிறார்கள். இந்த முறைகேடு விவகாரம் வெளிச்சத்திற்கு வந்ததிலிருந்தே நன்கொடை எண்ணும் மையத்திற்கு வரும் ஊழியர்களின் எண்ணிக்கை குறைந்துவிட்டதாக அறக்கட்டளை வட்டாரங்கள் தெரிவித்தன. விசாரணை குறித்த அச்சம் காரணமாக, மொத்தம் இருந்த சுமார் 40 ஊழியர்களில் 15 முதல் 20 பேர் மட்டுமே தொடர்ந்து பணிக்கு வந்துள்ளனர். பாதிக்கும் மேற்பட்ட ஊழியர்கள் பணியை ராஜினாமா செய்துவிட்டனர்.
தகவல்களின்படி, சுமார் 20 ஊழியர்கள் தங்கள் பணியிலிருந்து விலகியுள்ளனர். முறைகேடு விவகாரம் வெளிவந்த பிறகு, நன்கொடை எண்ணும் பணி அதிக நேரம் எடுக்கும் ஒன்றாக மாறியுள்ளதாகவும், அதனால் பணிச்சுமை அதிகரித்துள்ளதாகவும் ராஜினாமா செய்த ஊழியர்கள் காரணம் தெரிவித்துள்ளனர். முன்பு இரண்டு ஷிப்டுகளாக நடைபெற்ற இப்பணி, தற்போது ஊதிய உயர்வு ஏதுமின்றி சுமார் 9 முதல் 10 மணி நேரம் கொண்ட ஒரே ஷிப்டாக மாற்றப்பட்டுள்ளதாகவும் அவர்கள் கூறினர்.
மேலும், முன்பு மேஜை மற்றும் நாற்காலிகளைப் பயன்படுத்தி நன்கொடைகள் எண்ணப்பட்ட நிலையில், தற்போது தரையில் அமர்ந்து இப்பணி மேற்கொள்ளப்படுவதாகவும் அவர்கள் தெரிவித்தனர். நன்கொடை எண்ணும் மையத்தில் பாதுகாப்பு மற்றும் கண்காணிப்பு நடவடிக்கைகள் கணிசமாக அதிகரிக்கப்பட்டுள்ளன. ஊழியர்கள் உள்ளே அனுமதிக்கப்படுவதற்கு முன்பு பல கட்ட சோதனைகளுக்கு உட்படுத்தப்படுகிறார்கள்.
மேலும், அவர்கள் வெறும் கால்களுடன் மட்டுமே உள்ளே செல்ல அனுமதிக்கப்படுகிறார்கள்; அலைபேசிகள் அல்லது தனிப்பட்ட உடைமைகளை எடுத்துச் செல்ல அனுமதி இல்லை. கோயில் வளாகத்திற்குள் உள்ள பல்வேறு பாதுகாப்புச் சோதனைச் சாவடிகளிலும் அவர்கள் சோதிக்கப்படுகிறார்கள். ஆனால் முன்பு அறக்கட்டளை வழங்கிய அடையாள அட்டையை மட்டும் காண்பித்தால் உள்ளே செல்ல போதுமானதாக இருந்தது.
நன்கொடை எண்ணும் பணியைக் கண்காணிக்கவே பிரத்யேகமாக நான்கு ஊழியர்கள் நியமிக்கப்பட்டுள்ளதாகத் தகவல்கள் தெரிவிக்கின்றன. டிஜிட்டல் பாதுகாப்பு அம்சங்களுடன் கூடிய கியூஆர் குறியீடு கொண்ட அடையாள அட்டைகள், வெளி ஒப்பந்த அடிப்படையில் பணிபுரியும் அனைத்து ஊழியர்களுக்கும் பொதுவான சீருடை மற்றும் ஒவ்வொரு ஊழியரின் நடமாட்டத்தையும் பதிவு செய்ய டிஜிட்டல் வருகைப் பதிவு முறை ஆகியவற்றை அறிமுகப்படுத்தவும் அறக்கட்டளை தயாராகி வருகிறது.
கோயில் காணிக்கைகளைக் கையாள்வதில் வெளிப்படைத்தன்மை மற்றும் பொறுப்புக்கூறலை வலுப்படுத்தும் நோக்கில், அறக்கட்டளை கடுமையான பாதுகாப்பு நடவடிக்கைகள் மற்றும் நடைமுறை மாற்றங்களை அறிமுகப்படுத்தி வரும் அதே வேளையில், காவல் துறை விசாரணையும் அறக்கட்டளையின் உள் ஆய்வும் ஒரே நேரத்தில் நடைபெற்று வருகின்றன.
* ஆம் ஆத்மி கையெழுத்து இயக்கம்
அயோத்தி ராமர் கோயில் நன்கொடை திருட்டு விவகாரத்தில் சம்பந்தப்பட்ட குற்றவாளிகளுக்குக் கடுமையான தண்டனை கோரி நாடு தழுவிய கையெழுத்து இயக்கத்தைத் தொடங்கவுள்ளதாக ஆம் ஆத்மி கட்சியின் தேசிய ஒருங்கிணைப்பாளர் அரவிந்த் கெஜ்ரிவால் தெரிவித்தார்.
* ஜூலை 13ல் விசாரிக்கிறது உச்ச நீதிமன்றம்
அயோத்தி ராமர் கோயில் நன்கொடைகள் கையாடல் செய்யப்பட்டதாகக் கூறப்படும் விவகாரம் குறித்து நியாயமான மற்றும் காலக்கெடுவுக்குள் விசாரணை நடத்தக் கோரும் மனுக்களை உச்ச நீதிமன்றம் ஜூலை 13 அன்று விசாரிக்கவுள்ளது. தலைமை நீதிபதி சூர்யா காந்த் மற்றும் நீதிபதிகள் ஜாய்மால்யா பாக்சி, வி. மோகனா ஆகியோர் அடங்கிய அமர்வு, இந்த விவகாரம் தொடர்பான மூன்று மனுக்களை விசாரிக்கும் என்று அறிவிக்கப்பட்டுள்ளது.
