சென்னை: ராயப்பேட்டை பீட்டர்ஸ் சாலை மேம்பாலத்தின் கீழ் யு-டர்ன் எடுக்க முயன்ற போது, எதிரே வந்த பைக் மீது மோதாமல் இருக்க பிரேக் பிடிப்பதற்கு பதில் ஆக்சிலேட்டரை அழுத்தியதால் கார் தலைகீழாக கவிழ்ந்து விபத்துக்குள்ளானது. அதை ஓட்டி வந்த வாலிபர் அதிர்ஷ்டவசமாக உயிர் தப்பினார். ராயப்பேட்டை அரசு மருத்துவமனை அருகே உள்ள பீட்டர்ஸ் சாலை மேம்பாலத்தின் கீழ் நேற்று மதியம் கார் ஒன்று வேகமாக வந்தது. அப்போது காரை மேம்பாலத்தின் கீழ் உள்ள சர்வீஸ் சாலையில் யு-டர்ன் எடுக்க முயன்ற போது, திடீரென குறுக்கே பைக் ஒன்று வந்தது.
இதை கவனித்த காரை ஓட்டி வந்த வாலிபர், பிரேக் பிடிப்பதற்கு பதில் ஆக்சிலேட்டரை அழுத்திவிட்டார். இதில் கார் அதிவேமாக பாய்ந்து சர்வீஸ் சாலையில் உள்ள கட்டையில் மோதி தலைகீழாக கவிழ்ந்து விபத்துக்குள்ளானது. அப்போது சாலையில் சென்ற வாகன ஓட்டிகள் மற்றும் பொதுமக்கள் காருக்குள் சிக்கிய வாலிபரை பத்திரமாக மீட்டனர். நல்வாய்ப்பாக சிறு காயங்கள் கூட ஏற்படாமல் அவர் உயிர் தப்பினார். விபத்து குறித்து தகவல் அறிந்த மயிலாப்பூர் போக்குவரத்து புலனாய்வு பிரிவு போலீசார், சம்பவ இடத்திற்கு வந்து தலைகீழாக கவிழ்ந்த காரை அங்கிருந்து அப்புறப்படுத்தினர்.
இந்த விபத்து நடக்கும் போது அருகில் மக்கள் யாரும் இல்லாததால் உயிர் சேதம் தவிர்க்கப்பட்டது. விபத்து குறித்து வழக்கு பதிவு செய்து போலீசார் காரை ஓட்டி வந்த வாலிபரிடம் விசாரணை நடத்தி வருகின்றனர். இந்த சம்பவத்தால் சிறிது நேரம் ராயப்பேட்டை அரசு மருத்துவமனை அருகே போக்குவரத்து நெரிசல் ஏற்பட்டது.
