உலகக்கோப்பைக்கு தயாராகும் அணி இந்திய டி20 கேப்டனாகிறார் ஸ்ரேயாஸ்: திலக் வர்மா அல்லது இஷான் கிஷன் துணை கேப்டன்: சூர்யகுமார் யாதவுக்கு பதில் சூர்யவன்ஷிக்கு டீமில் இடம்?

மும்பை: ஐபிஎல் தொடர் முடிந்த நிலையில் இந்திய அணி அடுத்ததாக சொந்த மண்ணில் ஆப்கானிஸ்தானுக்கு எதிராக ஒரு டெஸ்ட், 3 ஒருநாள் போட்டிகளில் ஆட உள்ளது. இதையடுத்து அயர்லாந்தில் சுற்றுப்பயணம் செய்து 2 டி20 போட்டியிலும் (ஜூன் 26, 28), இங்கிலாந்துக்கு எதிராக 5 டி20 போட்டிகளிலும் ஆட உள்ளது. இந்த போட்டி முறையே ஜூலை 1, 4, 7, 9, 11 ஆகிய தேதிகளில் நடைபெற உள்ளது. அயர்லாந்து மற்றும் இங்கிலாந்துக்கு எதிராக டி20 தொடருக்கான இந்திய அணி விரைவில் அறிவிக்கப்பட உள்ளது.

தற்போது டி20 அணியின் கேப்டனாக உள்ள சூர்யகுமார் யாதவ் அணியில் இருந்து நீக்கப்பட உள்ளார். அவருக்கு 35 வயதாகும் நிலையில் மோசமான பார்ம் மற்றும் அடுத்த டி20 உலக கோப்பையை கருத்தில் கொண்டு அவரை நீக்க பிசிசிஐ திட்டமிட்டுள்ளது. சூர்யகுமார் இதுவரை 113 டி20 போட்டிகளில் விளையாடி, 36.35 சராசரி மற்றும் 162.94 ஸ்டிரைக் ரேட்டுடன் 3272 ரன் எடுத்துள்ளார். இருப்பினும், சமீப காலமாக அவரின் சராசரி குறைந்துள்ளது. 2025 ஜனவரி 1, முதல் மார்ச் 2026 வரை, அவர் 35 போட்டிகளில் 26 சராசரியில் 702 ரன் எடுத்துள்ளார்.

ஆனால் 2024 ஜனவரி 1, முதல் 2024 டிசம்பர் 31 வரை, அவர் 18 டி20 போட்டிகளில் விளையாடி, 26.81 சராசரியில் 429 ரன்கள் எடுத்திருந்தார். ஐபிஎல்லில் அவர் 13 இன்னிங்ஸ்களில் 270 ரன் மட்டுமே எடுத்தார். அவரது சராசரி வெறும் 20.76 தான். கடந்த மார்ச்சில் சொந்த மண்ணில் அவரின் தலைமையில் டி20 உலக கோப்பையை இந்தியா வென்ற போதிலும் இளம்வீரர்களுக்கு வாய்ப்பு அளிக்க முடிவெடுக்கப்பட்டுள்ளது. அவருக்கு பதிலாக ஸ்ரேயாஸ் அய்யர் கேப்டனாக நியமிக்கப்பட உள்ளார்.

இதேபோல் தற்போது துணை கேப்டனாக உள்ள அக்சர்பட்டேலுக்கு பதிலாக திலக் வர்மா, இஷான் கிஷன் நியமிக்கப்படலாம். இதில் திலக்வர்மாவுக்கே அதிக வாய்ப்பு இருப்பதாக தெரிகிறது. சூர்யகுமாருக்கு பதிலாக ஐபிஎல்லில் கலக்கிய 15 வயது மிரட்டல் புயல் சூர்யவன்ஷி அணியில் இடம்பெறக்கூடும் என தெரிகிறது.

இதுபற்றி பிசிசிஐ உயர் அதிகாரி கூறுகையில், ‘‘தேர்வுக் குழு, பிசிசி மற்றும் அணி நிர்வாகம், பயிற்சியாளர் காம்பீருடன் கலந்தாலோசித்த பிறகு, இந்தியா இனிமேல் ஒரு புதிய கேப்டனுடன் செயல்பட வேண்டும் என்று முடிவு செய்துள்ளன. சூர்யாவின் கேப்டன்சியின் கீழ் அணி டி20 உலகக் கோப்பையை வென்றது. ஆனால் அவரது ஃபார்ம் மற்றும் எதிர்காலத்தைக் கருத்தில் கொண்டு, அவரை மாற்றுவதற்கான நேரம் இது என்று அவர்கள் உணர்ந்தனர். அவர் தேர்வுக்குப் பரிசீலிக்கப்பட மாட்டார்.இந்த முடிவு விரைவில் சூர்யாவுக்குத் தெரிவிக்கப்படும்,” என்றார்.

* சூர்யா தலைமையில்…
சூர்யகுமார் தலைமையில் இந்திய கிரிக்கெட் அணி 52 டி20 போட்டிகளில் ஆடி 40ல் வெற்றுள்ளது. வெற்றி சராசரி 76.92 ஆகும். 8ல் தோல்வி, 2 போட்டி டையில் முடிந்துள்ளது. 2 கைவிடப்பட்டுள்ளது. அதிகபட்சமாக ரோகித்சர்மா தலைமையில் 62 போட்டியில் 49ல் வென்றுள்ளது. வெற்றி சதவீதம் 79.03 ஆகும்.