சென்னை: தமிழக அரசியலில் மாற்றத்தை தருவதாக தவெக கூறியது இதை தானா? என்று அமமுக பொதுச்செயலாளர் தினகரனின் குதிரைபேர குற்றச்சாட்டை குறிப்பிட்டு திமுக எம்.பி வில்சன் கேள்வி எழுப்பி இருக்கிறார். திமுக எம்.பி வில்சன் தனது சமீபத்திய எக்ஸ் பதிவில், “தமிழக அரசியலில் தாங்கள் ‘மாற்றத்தைக்’ கொண்டுவரப்போவதாக அவர்கள் (தவெக) கூறினார்கள். அதன் உண்மையான அர்த்தம் என்ன என்பதை இப்போது நான் புரிந்துகொண்டேன் — கடந்த பல ஆண்டுகளாகத் தமிழகம் இத்தகைய ‘குதிரை பேரம்’ முயற்சிகளைப் பார்த்ததே இல்லை! இவையெல்லாம், அவர்கள் இன்னும் பொறுப்பேற்பதற்கு முன்பே நடக்கின்றன!” என்று கூறி இருக்கிறார்.
முன்னதாக அமமுக எம்எல்ஏ காமராஜ் பெயரில் தவெக ஆளுநரிடம் போலி ஆதரவு கடிதத்தை கொடுத்துள்ளதாக அந்த கட்சியின் பொதுச்செயலாளர் தினகரன் குற்றம்சாட்டி இருந்தார். ஆட்சி அமைத்தே தீர வேண்டும் என்ற பதவி வெறியில் விஜய், குதிரை பேரத்தில் ஈடுபட்டு வருவதாகவும் தினகரன் குற்றம்சாட்டி உள்ளது அரசியல் வட்டாரத்தில் மட்டுமல்லாமல், மக்கள் மத்தியிலும் அதிருப்தியை ஏற்படுத்தி உள்ளது குறிப்பிடத்தக்கது.
