சென்னை: ஷார்ஜாவில் இருந்து வந்து சென்னையில் தரையிறங்கிய, ஏர் அரேபியா விமானத்தின் அவசர கால கதவை திறந்து, குதித்து ஓடிய பயணியால் பரபரப்பு ஏற்பட்டது. ஓடுபாதையின் அருகே விமானம் நின்றதால் லாகூரில் இருந்து வந்த விமானம் பெங்களூருக்கு திருப்பி விடப்பட்டது.
ஷார்ஜாவிலிருந்து சென்னை வந்த ஏர் அரேபியா விமானத்தில் இன்று அதிகாலை ஒரு அதிர்ச்சிகரமான சம்பவம் நிகழ்ந்தது. விமானம் சென்னை சர்வதேச விமான நிலையத்தில் தரையிறங்கி, பிரதான ஓடுபாதையில் இருந்து விலகி மெதுவாக நிறுத்துமிடத்தை நோக்கிச் சென்று கொண்டிருந்தபோது, ஆண் பயணி ஒருவர் திடீரென அவசர கால கதவைத் திறந்து கீழே குதித்தார். விமானம் முழுமையாக நிற்பதற்கு முன்பே அவர் இச்செயலில் ஈடுபட்டதால் சக பயணிகள் பெரும் பீதியடைந்தனர்.
இது குறித்து கருத்து தெரிவித்த விமான நிலைய உயர் அதிகாரி, விமானம் மெதுவாக நகர்ந்து கொண்டிருந்த போதே அவர் குதித்ததாகவும், அதிர்ஷ்டவசமாக இந்தச் சம்பவத்தில் உயிர்ச்சேதமோ அல்லது விமானத்திற்குப் பாதிப்போ ஏற்படவில்லை என்றும் உறுதிப்படுத்தினார். மேலும், இந்தச் சம்பவம் பிரதான ஓடுபாதையில் நடைபெறவில்லை என்பதால் பெரும் விபத்து தவிர்க்கப்பட்டதாகவும் அவர் தெரிவித்தார்.
முதற்கட்ட விசாரணையில், அந்தப் பயணி பயணத்தின் போது உடல்நலக் குறைவால் பாதிக்கப்பட்டிருந்தது தெரியவந்துள்ளது. அவர் தனக்கு வாந்தி வருவது போல் இருப்பதாகக் கூறி, விமானத்திற்குள்ளேயே இரண்டு முறை வாந்தி எடுத்துள்ளார். உடல்நல பாதிப்பால் ஏற்பட்ட ஒருவித மன உளைச்சல் அல்லது பதற்றம் காரணமாகவே அவர் இத்தகைய விபரீத முடிவை எடுத்திருக்கலாம் என்று கூறப்படுகிறது.
பயணி குதித்த உடனே விமானி அளித்த தகவலின் பேரில், மத்திய தொழில்துறை பாதுகாப்புப் படை வீரர்கள் விரைந்து வந்து அந்தப் பயணியைப் பிடித்தனர். பின்னர் அவர் மேல் விசாரணைக்காக காவல்துறையிடம் ஒப்படைக்கப்பட்டார். இந்த அசம்பாவிதத்தால் அதிகாலை 3:23 மணி முதல் 4:23 மணி வரை பிரதான ஓடுபாதை மூடப்பட்டு, விமானங்கள் மாற்றுப் பாதைக்குத் திருப்பி விடப்பட்டன. விசாரணையில் அவர் புதுக்கோட்டை மாவட்டத்தைச் சேர்ந்தவர் எனத் தெரியவந்துள்ளது. இச்சம்பவம் குறித்து சென்னை விமான நிலைய போலீசார் தொடர்ந்து விசாரித்து வருகின்றனர்.
