ஐக்கிய நாடுகள் சபை: ஆசியா மற்றும் பசிபிக் பிராந்தியத்திற்கான ஐக்கிய நாடுகளின் பொருளாதார மற்றும் சமூக ஆணையம் வெளியிட்ட ஆய்வறிக்கையில், தெற்கு மற்றும் தென்மேற்கு ஆசிய பிராந்தியங்களின் பொருளாதார வளர்ச்சி 2024ம் ஆண்டில் 5.2 சதவீதமாக இருந்த நிலையில், 2025ம் ஆண்டில் 5.4 சதவீதமாக வளர்ச்சி அடைந்ததாக தெரிவித்துள்ளது. இந்த வளர்ச்சிக்கு இந்தியாவின் வலுவான பொருளாதார வளர்ச்சியே முக்கிய காரணமாக அமைந்ததாக குறிப்பிட்டுள்ளது. 2024ல் இந்தியாவின் பொருளாதார வளர்ச்சி 7.4 சதவீதமாக உயர்ந்ததாக அறிக்கையில் குறிப்பிடப்பட்டுள்ளது.

இந்தியாவில் குறிப்பாக கிராமப்புற பொருளாதாரத்திலிருந்து வலுவான நுகர்வு செலவுகள், ஜிஎஸ்டி விகித குறைப்புகள் ஆகியவை இந்த வளர்ச்சிக்கு துணை புரிந்ததாக கூறப்பட்டுள்ளது. இந்த ஆய்வறிக்கையில், நடப்பாண்டில் இந்தியாவின் பொருளாதார வளர்ச்சி 6.4 சதவீதமாக இருக்கும் என்றும், 2027ம் ஆண்டில் 6.6 சதவீத வளர்ச்சி விகிதம் பதிவு செய்யும் என்றும் கணிக்கப்பட்டுள்ளது. நடப்பாண்டில் நாட்டின் பணவீக்க விகிதம் 4.4 சதவீதமாகவும், 2027ல் 4.3 சதவீதமாகவும் இருக்கும் என கூறப்பட்டுள்ளது.