சென்னை: நடிகர் ரஜினிகாந்த், ஜெயிலர்-2 திரைப்பட படப்பிடிப்பில் கலந்து கொள்வதற்காக, நேற்று சென்னையில் இருந்து இண்டிகோ ஏர்லைன்ஸ் பயணிகள் விமானத்தில் ஐதராபாத் புறப்பட்டு சென்றார். அப்போது ரஜினிகாந்த் சென்னை விமான நிலையத்தில் செய்தியாளர்களுக்கு அளித்த பேட்டி: ஜெயிலர்-2 படப்பிடிப்பு இறுதி கட்டத்தை நெருங்கிக் கொண்டு இருக்கிறது. ஆல்மோஸ்ட் படப்பிடிப்பு முடிந்து விட்டது. படம் எப்போது வெளியாகும் என்பது குறித்து, ப்ரொடக்ஷன் பிரிவு அறிவிப்பார்கள்.
தமிழக சட்டசபை தேர்தல் குறித்து, தமிழக மக்களுக்கு, நீங்கள் என்ன கூற விரும்புகிறீர்கள்? என்ற கேள்விக்கு, பதில் ஏதும் கூறாமல், சிரித்துக் கொண்டே, இரு கரங்களைக் கூப்பி வணக்கம் தெரிவித்தார். நீங்களும், நடிகர் கமல்ஹாசனும் இணைந்து நடிக்கும், திரைப்பட படப்பிடிப்பு எப்போது தொடங்கும் என்ற கேள்விக்கு, ஆகஸ்ட் மாதத்தில் படப்பிடிப்பு தொடங்க இருக்கிறது என்று கூறினார். நீங்கள் தேர்தல் பிரசாரத்தில் ஈடுபட வாய்ப்பு உள்ளதா என்ற கேள்விக்கு, சிரித்துக் கொண்டே, நோ கமெண்ட்ஸ்… என்று கூறிவிட்டு, விமான நிலையத்திற்குள் சென்று விட்டார்.
