புதுச்சேரி தேர்தல் பிரசாரம் அமித்ஷா, ராகுல் காந்தி நாளை சென்னை வருகை

சென்னை: ஒன்றிய உள்துறை அமைச்சர் அமித்ஷா நாளை மாலை 3.15 மணிக்கு தனி விமானத்தில் கொச்சியிலிருந்து சென்னை வருகிறார். உடனடியாக தனி ஹெலிகாப்டரில் புதுச்சேரி செல்கிறார். அங்கு தேசிய ஜனநாயக கூட்டணி வேட்பாளர்களை ஆதரித்து பிரசாரம் செய்கிறார். பிரசாரத்தை முடித்துவிட்டு தனி ஹெலிகாப்டரில் மாலை 6.10 மணிக்கு சென்னை வருகிறார். அங்கிருந்து வெளி யில் செல்லாமல் அமித்ஷா முக்கிய பிரமுகர் லவூஞ்சில் சிறிது நேரம் ஓய்வு எடுக்கிறார்.

அப்போது தமிழக பாஜ தலைவர்கள் சிலரை சந்தித்து பேசுவதற்கு வாய்ப்பு உள்ளது என்று கூறப்படுகிறது. அதன் பின்பு அமித்ஷா, சென்னை பழைய விமான நிலையத்தில் இருந்து தனி விமானத்தில் டெல்லி புறப்பட்டு செல்கிறார். இந்த நிலையில் அகில இந்திய காங்கிரஸ் துணை தலைவரும், எதிர்க்கட்சி தலைவருமான ராகுல் காந்தி டெல்லியில் இருந்து தனி விமானத்தில் புறப்பட்டு, காலை 10 மணிக்கு சென்னை பழைய விமான நிலையம் வருகிறார்.

சென்னை பழைய விமான நிலையத்தில் தமிழக காங்கிரஸ் தலைவர்கள் ராகுல் காந்தியை வரவேற்கின்றனர். வரவேற்பு நிகழ்ச்சியை முடித்துவிட்டு சென்னை பழைய விமான நிலையத்தில் உள்ள முக்கிய பிரமுகர்கள் லவூஞ்சில் சில நிமிடங்கள் கட்சித் தலைவர்களுடன் ஆலோசனை நடத்துகிறார். அதன்பின்பு ராகுல் காந்தி, சென்னை பழைய விமான நிலையத்தில் இருந்து 12 பேர் பயணிக்க கூடிய மினி விமானத்தில் சென்னையில் இருந்து புதுச்சேரி செல்கிறார்.

அதன் பின்பு ராகுல் காந்தி சென்னைக்கு திரும்பி வரும் நிகழ்ச்சி எதுவும் இதுவரை அறிவிக்கப்படவில்லை. சென்னை விமான நிலையத்தில் நாளை அடுத்தடுத்து 2 முக்கிய தலைவர்கள் வருகையை ஒட்டி முக்கிய பிரமுகர்களுக்கான பாதுகாப்பு அதிகாரிகள் அவசர ஆலோசனைக் கூட்டம் நடத்தினர்.