2 தொகுதிகளில் போட்டியிடும் விஜய் குழப்பத்தில் தவெக தொண்டர்கள்: ஐடியாக்களை அள்ளி வழங்கும் நெட்டிசன்கள்

சென்னை: நடிகர் விஜய், பெரம்பூர் மற்றும் திருச்சி கிழக்கு ஆகிய 2 தொகுதிகளில் போட்டியிடுகிறார். இந்நிலையில், தவெக ஆதரவாளர்கள் புதிய குழப்பத்தில் உள்ளனர். தவெக ஆதரவாளர் ஒருவர், ‘நான் கோவையைச் சேர்ந்தவன். நான் பெரம்பூரில் விஜய்க்கு வாக்களித்த பின்னர் திருச்சி கிழக்கு தொகுதிக்குச் சென்று வாக்களிக்க வேண்டும். அதற்கு ஏற்ற எளிமையான போக்குவரத்தை பரிந்துரை செய்ய வேண்டும்’ என சமூகவலைதளத்தில் பதிவிட்டுள்ளார். அவரின் இந்த கேள்விக்குச் சமூக வலைதளங்களில் நெட்டிசன்கள் கலாய்க்கும் விதமாகப் பல்வேறு ஐடியாக்களை பதிவிட்டு வருகிறார்கள். தவெகவினர் சார்பில் தேர்தல் ஆணையத்திற்கு கடிதம் எழுதி பெரம்பூருக்கும் திருச்சி கிழக்குக்கும் வேறு வேறு நாட்களில் தேர்தல் நடத்த வலியுறுத்துங்கள் என்று கூறி ஓட்டுகின்றனர். மேலும், விஜய் இரண்டு தொகுதிகளில் நிற்பதை முன்கூட்டியே அறிந்துகொண்ட திமுக, ஒரே ஒரு வாக்காளர் அட்டையை மட்டுமே கொடுத்துள்ளது. அதைக் கேள்வி கேளுங்கள் எனவும் கலாய்த்து வருகிறார்கள் நெட்டிசன்கள்.