புதுடெல்லி: சிறிய விதிமீறல்கள் இனிமேல் குற்றமல்ல என்ற வகையில் புதிய பரிந்துரைகளை மக்களவையில் நாடாளுமன்ற கூட்டுக் குழு தாக்கல் செய்தது. நாட்டின் தொழில் வளர்ச்சியை ஊக்குவிக்கவும், மக்களின் வாழ்க்கை தரத்தை மேம்படுத்தவும் ஒன்றிய அரசு பல்வேறு சட்ட சீர்திருத்தங்களை மேற்கொண்டு வருகிறது. இதன் ஒரு பகுதியாக, கடந்த காலங்களில் சிறு சிறு தொழில்நுட்ப தவறுகளுக்காகவும், நடைமுறை பிழைகளுக்காகவும் தொழில் முனைவோர் மீது கிரிமினல் நடவடிக்கை எடுக்கப்பட்டு வந்தது.
இத்தகைய தேவையற்ற சட்ட நெருக்கடிகளை குறைத்து, நிர்வாக நடைமுறைகளை எளிதாக்க ‘ஜன விஸ்வாஸ்’ சட்ட திருத்த மசோதா கொண்டு வரப்பட்டது. இந்த மசோதா குறித்து ஆய்வு செய்ய பாஜக எம்பி தேஜஸ்வி சூர்யா தலைமையில் அமைக்கப்பட்ட நாடாளுமன்ற கூட்டுக்குழு, தனது விரிவான அறிக்கையை நேற்று மக்களவையில் தாக்கல் செய்தது. கடந்த 2025ம் ஆண்டு அக்டோபர் மாதம் முதல் 49 முறை ஆலோசனைக் கூட்டங்களை நடத்திய இந்த குழு, 78 சட்டங்களில் உள்ள 689 ஷரத்துக்களை குற்றவியல் நடவடிக்கையில் இருந்து விடுவிக்க பரிந்துரை செய்துள்ளது.
இதன் மூலம் இந்தியாவில் இதுவரை இல்லாத அளவாக 1,000க்கும் மேற்பட்ட குற்றவியல் பிரிவுகள் நீக்கப்பட உள்ளன. குறிப்பாக, மோட்டார் வாகன சட்டம், மருந்து மற்றும் அழகுசாதனப் பொருட்கள் சட்டம், டெல்லி மாநகராட்சி சட்டம் உள்ளிட்ட முக்கிய சட்டங்களில் மாற்றங்கள் செய்யப்பட்டுள்ளன. போக்குவரத்து துறையில் சிறு தவறுகளுக்கு அபராதம் விதிக்கப்படுவதில் உள்ள சிக்கல்கள் குறைக்கப்பட்டு, அவை சிவில் அபராதமாக மாற்றப்பட்டுள்ளன. அதேபோல், டீ, காபி மற்றும் வாசனை திரவிய வாரிய சட்டங்களில் உள்ள கிரிமினல் பிரிவுகள் நீக்கப்பட்டுள்ளதால் குறு, சிறு மற்றும் நடுத்தர தொழில் நிறுவனங்களுக்கு எதிரான தேவையற்ற கெடுபிடிகள் முடிவுக்கு வரும்.
சூழலியல் மற்றும் வன பாதுகாப்பு சட்டங்களிலும் அபராதங்கள் முறைப்படுத்தப்பட்டுள்ளன. அபராதத் தொகையை மூன்றாண்டுகளுக்கு ஒருமுறை 10 சதவீதம் உயர்த்தவும், நீதிமன்றங்களின் சுமையை குறைக்க பிரத்யேக அதிகாரிகளை நியமிக்கவும் குழு பரிந்துரைத்துள்ளது. இது குறித்து குழுவின் தலைவர் தேஜஸ்வி சூர்யா கூறுகையில், ‘பொது பாதுகாப்பு மற்றும் நம்பிக்கையை பாதிக்கும் கடுமையான குற்றங்களுக்கு தண்டனை உறுதி செய்யப்படும் அதே வேளையில், சிறிய அளவிலான நடைமுறை விதிமீறல்கள் இனிமேல் கிரிமினல் குற்றங்களாக கருதப்படாது என்பதை இக்குழு உறுதி செய்துள்ளது’ என்று தெரிவித்தார்.
