கவுகாத்தி: “காங்கிரஸ் அரசு சுயநல அரசியலுக்காக பொய்யான வாக்குறுதிகளை அள்ளி வீசியதுடன், பல ஒப்பந்தங்களில் கையெழுத்திட்டது” என பிரதமர் மோடி குற்றம்சாட்டி உள்ளார். 126 உறுப்பினர்களை கொண்ட அசாம் சட்டப்பேரவைக்கு தேர்தல் நடைபெறவுள்ள நிலையில், பிரதமர் மோடி அசாமுக்கு பயணம் மேற்கொண்டுள்ளார். நேற்று கோக்ரஜார் மாவட்டத்துக்கு சென்ற மோடி, அங்கிருந்து பல்வேறு நலத்திட்டங்களை தொடங்கி வைத்தார்.
பின்னர் நடந்த நிகழ்ச்சியில் பேசிய பிரதமர் மோடி, “வடகிழக்கு மாநிலங்களில் வெடிகுண்டுகள் மற்றும் துப்பாக்கி சத்தங்கள் கேட்டது கடந்த காங்கிரஸ் ஆட்சிக்காலம். இந்த மாநிலங்களில் பாஜ தற்போது அமைதியை உறுதி செய்துள்ளது.
காங்கிரஸ் எப்போதும் ஊடுருவல்காரர்களுக்கு ஆதரவு அளித்து வந்துள்ளது. பல தசாப்தங்களாக அசாமில் உள்ள பூர்வகுடி மக்களுக்கு நிலம் பற்றிய அடிப்படை சட்ட ஆவணங்களை தர மறுத்து வந்த காங்கிரஸ் ஆட்சி, பழங்குடியினரின் நிலங்களை அபகரித்து ஊடுருவல்காரர்களிடம் ஒப்படைத்து தேசிய பாதுகாப்புக்கு அச்சுறுத்தலை ஏற்படுத்தியது. தற்போது ஹிமந்த பிஸ்வா சர்மா தலைமையிலான இரட்டை இன்ஜின் பாஜ ஆட்சி, ஊடுருவல்காரர்களிடமிருந்து ஆக்கிரமிப்பு நிலங்களை கைப்பற்றுவதற்கான இயக்கத்தை முன்னெடுத்து வருவதில் நான் மகிழ்ச்சி அடைகிறேன். பாஜ அரசாங்கம் பழங்குடியின மக்களுக்கு உரிமைகளை வழங்கி உள்ளது” என்றார்.
தொடர்ந்து பேசிய மோடி, “காங்கிரஸ் ஆட்சியில் பொய்யான வாக்குறுதிகளை அளித்து வந்தது. அது ஒரு பொய் வாக்குறுதிகளை விற்கும் கடை. ஒவ்வொரு பொய்யான வாக்குறுதியுடனும், 4 பெரிய பொய்களையும் போனசாக வழங்கி வருகிறது. அவர்கள் அளிக்கும் வாக்குறுதிகளை நிறைவேற்ற வேண்டும் என்ற எண்ணம் அவர்களுக்கு எப்போதும் இருந்தது இல்லை. இதேபோல், போடோலாந்து மக்களை பல தலைமுறைகளாக மாயக்கனவுகளில் சிக்க வைத்த காங்கிரஸ், தனது சுயநல அரசியலுக்காக பல சமூகங்களுக்கிடையே பிளவுகளை ஏற்படுத்தியது. பல்வேறு ஒப்பந்தங்களில் கையெழுத்திட்டது. ஆனால் தற்போது பாஜ அரசில் மாநிலம் முழுவதும் அமைதி நிலவுகிறது. இந்த பாவங்களுக்காக நடைபெறவுள்ள தேர்தலில் காங்கிரசை தண்டிக்கவும், ஊடுருவல்காரர்களுக்கு இங்கே இடமில்லை என்ற செய்தியை மக்கள் தெரிவிக்க வேண்டும்” என தெரிவித்தார்.
