கடந்த சட்டப்பேரவை தேர்தலில் கோவை மாவட்டத்தில் உள்ள 10 தொகுதிகளிலும் திமுக வெற்றி வாய்ப்பை இழந்தது. பின்னர் கோவை மாவட்ட பொறுப்பு அமைச்சராக செந்தில் பாலாஜி நியமிக்கப்பட்டதை தொடர்ந்து, கட்சியை பலப்படுத்தும் பணிகளில் தீவிரமாக ஈடுபட்டார். இதன் பலனாக நகர்ப்புற உள்ளாட்சி தேர்தல் மற்றும் நாடாளுமன்ற தேர்தலில் திமுக அபார வெற்றி பெற்றது.
இத்தேர்தல்களில் அதிமுக முன்னாள் அமைச்சர் எஸ்.பி.வேலுமணியின் சொந்த வார்டு மற்றும் தொகுதிகளிலும் கூட அதிமுக படுதோல்வியை தழுவியது. தற்போது செந்தில் பாலாஜியிடம் அமைச்சர் பொறுப்பு இல்லை என்றாலும், மண்டல பொறுப்பாளாராக செயல்பட்டு வருகிறார். இந்த நிலையில் கோவை மாவட்டத்தில் கட்சியை வலிமையாக்கும் வகையில் வருகின்ற சட்டப்பேரவை தேர்தலில் கோவை மாவட்டத்தில் உள்ள தொகுதிகளில் அதிமுக கூட்டணி வேட்பாளர்களுக்கு எதிராக பலம் வாய்ந்த வேட்பாளர்களை களமிறக்க திமுக திட்டமிட்டுள்ளது.
அதன் ஒரு பகுதியாக கோவையில் உள்ள ஒரு தொகுதியில் செந்தில் பாலாஜி போட்டியிடலாம் என கூறப்பட்டது. மேலும் கோவை தெற்கு தொகுதியில் செந்தில் பாலாஜி போட்டியிட வேண்டும் என சிலர் விருப்ப மனுக்களையும் அளித்தனர். இதன்படி கோவை தெற்கு தொகுதியில் செந்தில் பாலாஜி போட்டியிட வாய்ப்பு உள்ளதாக தகவல் வெளியாகியுள்ளது.
இதேபோல திமுக மாணவரணி மாநில செயலாளர் ராஜீவ்காந்தி கோவை தெற்கு தொகுதியில் போட்டியிட விருப்ப மனு அளித்துள்ள நிலையில், செந்தில் பாலாஜி கோவை தெற்கு தொகுதியில் களமிறக்கப்படலாம் என்பதாலேயே கோவை தெற்கு சிட்டிங் எம்எல்ஏ வானதி தொகுதி மாற முடிவெடுத்துள்ளதாக தகவல் வெளியாகி உள்ளது.
