சில்லிபாயிண்ட்…

* பிரேக் சர்வதேச செஸ் வின்சென்ட் கீமர் வெற்றி
பிரேக்: பிரேக் சர்வதேச செஸ் போட்டியின் 7வது சுற்று போட்டியில் நேற்று ஜெர்மனி கிராண்ட் மாஸ்டர் வின்சென்ட் கீமர், ஸ்பெயின் கிராண்ட் மாஸ்டர் டேவிட் ஆன்டனை வீழ்த்தினார். பிரேக் சர்வதேச செஸ் போட்டிகள் செக் குடியரசின் பிரேக் நகரில் நடந்து வருகின்றன. நேற்று நடந்த 7வது சுற்றுப் போட்டியில் ஜெர்மனி கிராண்ட் மாஸ்டர் வின்சென்ட் கீமர் – ஸ்பெயின் கிராண்ட் மாஸ்டர் டேவிட் ஆன்டன் மோதினர். இப்போட்டியில் சிறப்பான ஆட்டத்தை வெளிப்படுத்திய வின்சென்ட் அபார வெற்றி பெற்றார்.

மற்றொரு போட்டியில் இந்தியாவை சேர்ந்த நடப்பு சாம்பியன் அரவிந்த் சிதம்பரம், உஸ்பெகிஸ்தான் கிராண்ட்மாஸ்டர் நோடிர்பெக் யாகுப்போவ் உடன் மோதினார். போட்டியின் பெரும்பகுதி நேரம் சிறப்பாக ஆடிக்கொண்டிருந்த அரவிந்த் வெற்றி பெறும் தருணத்தில் இருந்தார். கடைசி கட்டத்தில் அவர் செய்த சிறு தவறை சரியாக பயன்படுத்திக் கொண்ட யாகுப்போவ், போட்டியை டிராவில் முடித்தார். ஈரான் கிராண்ட் மாஸ்டர் பர்ஹாம் மேக்சூட்லூ உடன் இந்தியாவை சேர்ந்த உலக செஸ் சாம்பியன் குகேஷ் மோதிய போட்டியும் டிராவில் முடிந்தது.

* ஃபின் ஆலன் அதிரடி சாதனை
கொல்கத்தா: உலகக் கோப்பை டி20 முதல் அரையிறுதிப் போட்டியில் தென் ஆப்ரிக்கா அணிக்கு எதிராக ஆடிய நியூசிலாந்து துவக்க வீரர் பின் ஆலன், 33 பந்துகளில் 100 ரன்கள் விளாசி அணியை வெற்றிபெறச் செய்தார். இதன் மூலம், டி20 உலகக்கோப்பை போட்டிகளில் குறைந்த பந்துகளில் அதிவேக சதம் விளாசிய வீரர் என்ற சாதனையை அவர் படைத்துள்ளார். இதற்கு முன், கடந்த 2016ல் வெஸ்ட் இண்டீஸ் வீர் கிறிஸ் கெயில், இங்கிலாந்து அணிக்கு எதிராக 47 பந்துகளில் சதம் விளாசியதே இதுவரை சாதனையாக இருந்து வந்தது. அந்த சாதனையை ஃபின் ஆலன் தற்போது தகர்த்துள்ளார்.

* தாய் நாடு திரும்பிய ஜிம்பாப்வே வீரர்கள்
புதுடெல்லி: உலகக்கோப்பை டி20 போட்டிகளில் ஆடிய பின்னர், இஸ்ரேல் – ஈரான் இடையே போர் வெடித்ததால் ஜிம்பாப்வே அணி வீரர்கள் தங்கள் நாட்டுக்கு செல்ல முடியாமல் பரிதவித்து வந்தனர். அவர்களை பாதுகாப்பாக அனுப்பி வைப்பதற்கான ஏற்பாடுகளை ஐசிசி செய்து வந்தது. இந்நிலையில், ஜிம்பாப்வே வீரர்களில் ஒரு பகுதியினர் மாற்று விமானம் மூலம் தங்கள் நாட்டுக்கு சென்று விட்டதாக தகவல் வெளியாகி உள்ளது. நடப்பு டி20 உலகக்கோப்பை போட்டிகளில் ஜிம்பாப்வே அணி, பலம் வாய்ந்த ஆஸ்திரேலியா, இலங்கை அணிகளை வெற்றி கண்டு சூப்பர் 8க்குள் நுழைந்தது குறிப்பிடத்தக்கது.