ஈரோடு வீரப்பன்சத்திரத்தில் உள்ள தனியார் திருமண மண்டபத்தில் தவெக செயல் வீரர்கள் ஆலோசனை கூட்டம் நேற்று நடந்தது.

கூட்டத்தில், தவெக நிர்வாகக்குழு தலைமை ஒருங்கிணைப்பாளர் செங்கோட்டையன் பேசியதாவது:
நான் தவெகவிற்கு வந்து 5 மாதங்கள் ஆகின்றன. 3 தலைமுறையுடன் அரசியல் பயணம் செய்துக்கொண்டிருக்கிறேன். 50 ஆண்டுகள் வரலாற்றுக்கு பிறகு, அதிமுகவில் இருந்து ஒரே நொடியில் தூக்கி எறியப்பட்டேன். அப்போது என்னை தாங்கி பிடித்தவர் விஜய் தான். எனக்கு விஜய் அவரது இதயத்தில் இடம் கொடுத்தார். எம்ஜிஆர், ஜெயலலிதா படத்தை எனது பாக்கெட்டில் வைத்து தவெக நிகழ்ச்சியில் கலந்து கொண்டேன். அதற்கு எப்போதும் ஜெயலலிதா படத்தை வைத்து கொள்ளுங்கள் என விஜய் சொன்னார். திமுகவை வீழ்த்த அதிமுகவிற்கு சக்தி இல்லை. ஏனென்றால், திமுகவிடம் அதிமுக 10 முறை தோற்றுள்ளது. இனிமேல் அதிமுகவால் எழுந்து நிற்க முடியாது. எழுந்து நின்று அதிமுகவால் போராட முடியாது. திமுகவை அதிமுகவால் வீழ்த்த முடியாது. இவ்வாறு செங்கோட்டையன் பேசினார்.

யார் அந்த அதிமுக முக்கிய புள்ளி… சஸ்பென்ஸ்!
கூட்டத்திற்கு பிறகு செங்கோட்டையன் நிருபர்களிடம் கூறுகையில், ‘‘தவெகவின் தேர்தல் வாக்குறுதிகள் விரைவில் வெளியிடப்படும். தவெகவுடன் முக்கிய தொழிலதிபர் ஒருவர் இணைய உள்ளார். அந்த தொழிலதிபர் தற்போது அதிமுகவில் இருக்கிறார். இப்போது அவரின் பெயரை சொன்னால் நன்றாக இருக்காது’’ என்றார். தவெக தலைவர் விஜய் எழுதி வைத்து பேசுவது குறித்து நிருபர்கள் எழுப்பிய கேள்விக்கு, ‘பிரதமர் முதல் எதிர்கட்சி தலைவர் வரை எழுதி வைத்து தான் பேசுகின்றனர்’ என்றார்.