பல்லகெலே: 2026 டி20 உலககோப்பை தொடரின் சூப்பர் 8 சுற்றில் இன்று இரவு 7 மணிக்கு பல்லகெலேவில் நடக்கும் போட்டியில் பாகிஸ்தான் அணி இங்கிலாந்துடன் மோதுகிறது. சூப்பர் 8 சுற்றில் பாகிஸ்தான் அணி தனது தொடக்க ஆட்டத்தில் நியூசிலாந்துடன் மோதுவதாக இருந்தது. அந்த போட்டி மழையால் கைவிடப்பட்ட நிலையில், இரு அணிகளுக்கும் தலா ஒரு புள்ளிகள் வழங்கப்பட்டன. இந்த நிலையில் அடுத்து மோதவுள்ள 2 போட்டிகளிலும் வெற்றி பெற்றால் மட்டுமே அரையிறுதிக்குள் நுழைய முடியும் என்பதால் இன்றைய போட்டி பாகிஸ்தான் அணிக்கு வாழ்வா? சாவா? போட்டியாகும். பாகிஸ்தான் அணியின் பெரும் பலமாக இருப்பது உஸ்மான் தாரிக்கின் மர்மமான சுழற்பந்துவீச்சு.
அவரது பந்துவீச்சு சர்ச்சையை ஏற்படுத்திவரும் அதே வேளையில், எதிரணியை மிரட்டிவருவதால் இங்கிலாந்து அணிக்கு அவரை எதிர்கொள்வதில் பெரும் சவால் காத்திருக்கிறது. இங்கிலாந்து அணி சூப்பர் 8 சுற்றில் தனது முதல் போட்டியில் இலங்கையை 51 ரன்கள் வித்தியாசத்தில் இதே பல்லகெலேவில் வீழ்த்தியது. இந்த மைதானம் மிகவும் மெதுவான தன்மை கொண்டது என்பதால் முதலில் பேட்டிங் செய்யும் அணி 150 ரன்களை தாண்டினாலே வெற்றி வாய்ப்பை எட்டிவிடலாம்.
இங்கிலாந்தை பொறுத்தவரை ஜோப்ரா ஆர்ச்சர், சாம் கர்ரன், அடில் ரஷீத், லியாம் டாசன் என பந்துவீச்சில் மிரட்டுகிறது. மேலும் வில் ஜாக்ஸ் ஆல்ரவுண்டராக ஜொலிப்பதால் இன்றைய போட்டியில் அவர் மாயாஜாலம் நிகழ்த்தக்கூடும். பேட்டிங்கை பொறுத்தவரை ஜாஸ் பட்லர் ஃபார்முக்கு திரும்ப வேண்டியது அவசியம். இந்த போட்டியில் சுழற்பந்துவீச்சு அதிக முக்கியத்துவம் பெரும் என்பதால் இரு அணிகளும் சுழற்பந்துவீச்சாளர்களை அதிகம் பயன்படுத்தும் என எதிர்பார்க்கலாம். இரு அணிகளும் அரையிறுதி வாய்ப்புக்கு போராடும் என்பதால் இன்றைய போட்டியில் அனல் பறப்பது உறுதி.
