வெலிங்டன்: வெஸ்ட் இண்டீஸ் கிரிக்கெட் அணிக்கு எதிரான 2வது டெஸ்ட் போட்டியில் நியூசிலாந்து அணி 9 விக்கெட் வித்தியாசத்தில் மகத்தான வெற்றி பெற்று சாதனை படைத்துள்ளது. வெஸ்ட் இண்டீஸ் கிரிக்கெட் அணி, நியூசிலாந்தில் சுற்றுப்பயணம் செய்து 3 டெஸ்ட் போட்டிகள் கொண்ட தொடரில் ஆடி வருகிறது. ஏற்கனவே நடந்த முதல் டெஸ்ட் போட்டி டிராவில் முடிந்த நிலையில், 2வது டெஸ்ட் போட்டி வெலிங்டன் நகரில் கடந்த 10ம் தேதி துவங்கியது. முதல் இன்னிங்சில் வெஸ்ட் இண்டீஸ் 205 ரன்களுக்கு சுருண்டது. நியூசிலாந்து முதல் இன்னிங்சில் 278 ரன்களுக்கு ஆட்டமிழந்தது. அதையடுத்து, 2வது இன்னிங்சை ஆடிய வெஸ்ட் இண்டீஸ் வீரர்கள் மீண்டும் சொதப்பலான ஆட்டத்தை அரங்கேற்றினர். 2ம் நாள் ஆட்ட நேர முடிவில் வெஸ்ட் இண்டீஸ் 2 விக்கெட் இழந்து 32 ரன் எடுத்திருந்தது.

இந்நிலையில், நேற்று 3ம் நாளில், 2வது இன்னிங்சை வெஸ்ட் இண்டீஸ் தொடர்ந்தது. நியூசிலாந்து வீரர்களின் பந்து வீச்சை எதிர்கொள்ள முடியாமல் வெஸ்ட் இண்டீஸ் வீரர்கள் சொற்ப ரன்களில் சுருண்டனர். பிராண்டன் கிங் 22, ஷாய் ஹோப் 5, கேப்டன் ரோஸ்டன் சேஸ் 2, கவெம் ஹாட்ஜ் 35, ஜஸ்டின் கிரீவ்ஸ் 25, டெவின் இம்லாக் 5, ஜெய்டன் சீல்ஸ் 0, ஒஜாய் ஷீல்ட்ஸ் 9 ரன் எடுத்து விக்கெட்டுகளை பறிகொடுத்தனர். 46.2 ஓவரில் வெஸ்ட் இண்டீசின் 2வது இன்னிங்ஸ், 128 ரன்னுக்குள் முடிவுக்கு வந்தது. நியூசிலாந்தின் ஜேகப் டஃபி 5, மைக்கேல் ரே 3 விக்கெட் சாய்த்தினர். பின், 56 ரன் இலக்குடன் 2வது இன்னிங்சை ஆடிய நியூசிலாந்து ஒரு விக்கெட் இழப்புக்கு 57 ரன் எடுத்து 9 விக்கெட் வித்தியாசத்தில் அசத்தல் வெற்றியை பதிவு செய்தது. இதன் மூலம், தொடரில் 1-0 என்ற கணக்கில் நியூசிலாந்து முன்னிலை வகிக்கிறது.