புரிந்து கொள்ளும் பக்குவம் இல்லாதவர் தமிழிசை: மக்கள் நீதி மய்யம் பதிலடி

சென்னை: கமல் ஹாசன் மிரட்டலுக்கு அஞ்சுபவர் அல்ல என்பதை தமிழிசை தெரிந்து கொள்ளவேண்டும் என மக்கள் நீதி மய்யத்தின் செய்தித் தொடர்பாளர் முரளி அப்பாஸ் தெரிவித்துள்ளார். இது தொடர்பாக அவர் வெளியிட்டுள்ள அறிக்கை: பாரதிய ஜனதாவில் கேட்பாரற்று இருக்கும் தமிழிசை சவுந்தரராஜன், கமல்ஹாசன் தனக்களிக்கப்பட்ட உலகநாயகன் என்ற பட்டத்தை தவிர்க்கும்படி வெளியிட்ட அறிக்கையை, அரைவேக்காட்டுத்தனமாக விமர்சித்துள்ளார். ஆளும் திமுகவின் மிரட்டலால்தான் தன் பட்டத்தை துறந்துள்ளதாக கணிப்பு வெளியிட்டுள்ளார்.

கமல் ஹாசன் மிரட்டலுக்கு அஞ்சுபவர் அல்ல என்பதை தமிழிசை, அவரது தலைவரை கேட்டு தெரிந்து கொள்ளவேண்டும். அத்துடன் மிரட்டலுக்கு பணிபவரும் அல்ல, முதல்வர் ஸ்டாலின் தலைமையிலான அரசு மிரட்டும் போக்குள்ள அரசுமல்ல என்பதை தமிழிசை புரிந்து கொள்ள வேண்டும். உலகநாயகன் பட்டத்தை துறந்தது தன்னை ஈடுபடுத்திக்கொண்ட கலைத்துறையில் முழுமை பெற்ற ஞானத்தின் வெளிப்பாடு. அது சாதித்த மனிதனின் பக்குவத்தின் வெளிப்பாடு. இதை புரிந்து கொள்ளும் பக்குவம் தங்களுக்கில்லை. இவ்வாறு அவர் குறிப்பிட்டுள்ளார்.

The post புரிந்து கொள்ளும் பக்குவம் இல்லாதவர் தமிழிசை: மக்கள் நீதி மய்யம் பதிலடி appeared first on Dinakaran.