இந்திய ரயில்வேயின் முதன்மையான பயணிகள் பெட்டி உற்பத்தி செய்யும் ஆலையான ICF, உற்பத்தியில் 2026-ஆம் நிதியாண்டில் தனது முந்தைய சாதனைகளை விஞ்சி ஒரு புதிய மைல்கல்லை எட்டியுள்ளது. 2025 – 2026-ஆம் நிதியாண்டில் தனது முந்தைய உற்பத்தி சாதனைகளை முறியடித்துள்ள ICF மொத்தம் 3,405 ரயில் பெட்டிகளை உற்பத்தி செய்து சாதனை படைத்துள்ளது. இந்த எண்ணிக்கை என்பது முந்தைய ஆண்டில் உற்பத்தி செய்யப்பட்ட 3,007 ரயில் பெட்டிகளுடன் ஒப்பிடுகையில் 13 சதவீதம் கூடுதல் ஆகும்.
இது தவிர மற்றொரு வரலாற்றுச் சிறப்புமிக்க சாதனையாக, பிப்ரவரி மாதத்தில் ICF-ஆனது தனது இருப்பிடத்தில் தயாரிக்கப்பட்ட 80,000-மாவது ரயில் பெட்டியை வெளியிட்டது. இதன் மூலம், தனது 70 ஆண்டுகாலப் பயணத்தில் ரயில் பெட்டி உற்பத்தியில் உலகளாவிய முக்கிய மைல்கல்லை ICF எட்டியுள்ளது.
1955-ம் ஆண்டு தொடங்கப்பட்ட ஐசிஎப் தொழிற்சாலை முன்பு சாதாரண ரயில் பெட்டிகளை தயாரித்த நிலையில் தற்போது உலகத்தரம் வாய்ந்த ரயில் பெட்டிகளை தயாரித்து வருகின்றது. சென்னையில் அமைந்திருக்கும் ஐசிஎப் தொழிற்சாலையில் தயாரிக்கபபடும் ரயில் பெட்டிகள் உள்நாடு மட்டுமின்றி வெளிநாடுகளுக்கும் ஏற்றுமதி செய்யப்பட்டு வருகிறது. குறிப்பாக இங்கு மின்சார ரயில், எக்ஸ்பிரஸ் ரயில், குளிர்சாதன வசதி கொண்ட ரயில் பெட்டிகள், சுற்றுலாவுக்கான ரெயில் பெட்டிகள், வந்தேபாரத் ரயில்களுக்கான பெட்டிகள் மற்றும் அம்ரித் பாரத் ரயில்களுக்கான பெட்டிகள் என பலவகைப்பட்ட ரயில்களுக்கான பெட்டிகள் சிறந்த மற்றும் நவீன முறையில் தயாரிக்கப்பட்டு வருகின்றன.
2026-ஆம் நிதியாண்டில் ICF-இன் உற்பத்தியானது மேம்பட்ட தொடர்வண்டி பெட்டிகள் மற்றும் நகர்ப்புறப் போக்குவரத்து தீர்வுகள் போன்றவற்றின் வலுவான கலவையாக அமைந்துள்ளது. இதில் வந்தே பாரத் படுக்கை வசதி கொண்ட மூன்று தொடர்வண்டிப் பெட்டிகள், வந்தே பாரத் சேர் கார் தொடர்வண்டிப் பத்து பெட்டிகள் மற்றும் குளிரூட்டப்பட்ட நான்கு EMU தொடர்வண்டிப் பெட்டிகள் ஆகியவற்றின் உற்பத்தியும் அடங்கும்.
கூடுதலாக ICF கொல்கத்தா மெட்ரோவிற்காக ஒன்பது தொடர்வண்டிப் பெட்டிகளை உற்பத்தி செய்து, நகர்ப்புறப் போக்குவரத்து உள்கட்டமைப்பை மேலும் வலுப்படுத்த உதவியது. ICF-ன் இந்த புதிய உற்பத்தி சாதனை, புதுமை, நவீனமயமாக்கலில் ICF தொடர்ந்து செலுத்தி வரும் கவனத்தை அடிக்கோடிட்டுக் காட்டுவதுடன், இந்தியாவின் ரயில்வே உள்கட்டமைப்பை வலுப்படுத்துவதிலும் பயணிகளின் அனுபவத்தை மேம்படுத்துவதிலும் ஒரு முக்கிய பங்காற்றுகிறது.
