சென்னை: சென்னையில் ஆபரணத் தங்கம் விலை சவரனுக்கு ரூ.800 உயர்ந்து ஒரு சவரன் ரூ.1,11,600க்கு விற்பனையாகிறது. சர்வதேச பொருளாதாரம் மற்றும் அரசியல் சூழல், அமெரிக்க டாலருக்கு நிகரான இந்திய ரூபாயின் மதிப்பு, தங்கத்தின் மீதான முதலீடு அதிகரிப்பு, உலக பங்குச்சந்தை முதலீடு உள்ளிட்டவற்றின் அடிப்படையில், தங்கத்தின் விலை நிர்ணயிக்கப்படுகிறது. ஈரான் அமெரிக்கா, இஸ்ரேல் இடையிலான போர் காரணமாக தங்கத்தின் விலையில் தாக்கம் ஏற்பட்டுள்ளது.
தங்கம் விலை நேற்று முன்தினம் அதிரடியாக பவுனுக்கு ரூ.2400 குறைந்தது. கிராமுக்கு ரூ.300 குறைந்து, ஒரு கிராம் ரூ.13,750க்கும், ஒரு பவுன் ரூ.1 லட்சத்து 10,000க்கும் விற்பனையானது. இதே போல வெள்ளி விலையும் கிராமுக்கு ரூ.10 குறைந்து ஒரு கிராம் ரூ.255க்கும், கிலோவுக்கு ரூ.10 ஆயிரம் குறைந்து, பார் வெள்ளி 2.55 லட்சத்துக்கும் விற்பனையானது.
இந்த விலை குறைவு நகை வாங்குவோருக்கு ஆறுதலை அளித்துள்ளது. இந்த நிலையில் நேற்று சென்னையில் தங்கம் விலை சவரனுக்கு ரூ.800 உயர்ந்து ரூ.1,10,800க்கு விற்கப்பட்டது. சென்னையில் தங்கம் கிராமுக்கு 100 ரூபாய் உயர்ந்து 13,850 ரூபாய்க்கு விற்பனையானது. வெள்ளி விலையில் நேற்று மாற்றமின்றி ஒரு கிராம் 255 ரூபாய்க்கு விற்பனை செய்யப்பட்டது.
இதனையடுத்து இன்று தங்கம் விலை சவரனுக்கு ரூ.800 உயர்ந்து ஒரு சவரன் ரூ.1,11,600க்கு விற்பனையாகிறது. தங்கம் விலை கிராமுக்கு ரூ.100 உயர்ந்து ஒரு கிராம் ரூ.13,950க்கு விற்பனையாகிறது. சென்னையில் சில்லறை வர்த்தகத்தில் ஒரு கிராம் வெள்ளி விலை மாற்றமின்றி ரூ.255க்கு விற்பனை செய்யப்படுகிறது.
