சென்னை: சட்டமன்றத் தேர்தலில் போட்டியிடும் அமமுக வேட்பாளர்கள் பட்டியலை பொதுச் செயலாளர் டிடிவி தினகரன் வெளியிட்டார். தமிழக சட்டசபை தேர்தலுக்கு இன்னும் ஒரு மாதம் கூட இல்லை. தேர்தல் தேதி நெருங்குவதால் அரசியல் கட்சிகள் தொகுதிப் பங்கீடு, வேட்பாளர்கள் அறிவிப்பு, பிரச்சாரம் என பணிகளை தீவிரப்படுத்தியுள்ளன. திமுக தொகுதி பங்கீட்டை நிறைவு செய்து வேட்பாளர்கள் பட்டியலை வெளியிட உள்ளது.
அதிமுக சார்பில் 150 தொகுதிகள் போட்டியிடும் வேட்பாளர்கள் லிஸ்டை வெளியிட்டுள்ளது. 17 பெண் வேட்பாளர்களுக்கு இதில் வாய்ப்பு வழங்கப்பட்டுள்ளது. இன்னும் 17 தொகுதிகளுக்கான வேட்பளர்கள் அறிவிப்பு மட்டுமே மீதம் இருக்கிறது. அதிமுக கூட்டணியில் உள்ள பாஜகவும் வேட்பாளர்கள் அறிவிப்பினை வெளியிட்டுள்ளது. இந்த நிலையில்தான் அதிமுக பாஜக் கூட்டணியில் உள்ள அமமுகவும் இன்று வேட்பாளர்கள் லிஸ்டை வெளியிட்டுள்ளது.
சென்னை அடையாறில் உள்ள கட்சி அலுவலகத்தில் அமமுக பொதுச்செயலாளர் டிடிவி தினகரன் இன்று வேட்பாளர்கள் பட்டியலை வெளியிட்டார். தேசிய ஜனநாயகக் கூட்டணியில் தினகரனின் அம்மா மக்கள் முன்னேற்றக் கழகம் 11 தொகுதிகளில் போட்டியிடுகிறது. அதாவது, சைதாப்பேட்டை (செந்தமிழன்), திருப்பத்தூர் (ஞானசேகரன்), ஓட்டப்பிடாரம் (சுந்தரராஜன்), திருவையாறு (வேலுகார்த்திகேயன்), பெரியகுளம் (கதிர்காமு), காரைக்குடி (தேர்போகிபாண்டி), திருச்சி மேற்கு (ராஜசேகரன்), மன்னார்குடி (எஸ்.காமராஜ்), பூந்தமல்லி (ஏழுமலை), மடத்துக்குளம் (சி.சண்முகவேலு), நாங்குநேரி (இசக்கிமுத்து) ஆகிய 11 தொகுதிகளில் அமமுக போட்டியிடுகின்றனர்.
