அமெரிக்கா: நியூயார்க்கின் லாகார்டியா விமான நிலைய ஓடுதளத்தில் தீயணைப்பு வாகனம் மீது ஏர் கனடா விமானம் மோதிய விபத்தில் 2 பேர் உயிரிழந்தனர். 3 பேர் பலத்த காயங்களுடன் மருத்துவமனையில் அனுமதிக்கப்பட்டுள்ளனர். விமானத்தில் இருந்த பயணிகள் அவசரகால கதவுகள் வழியே வெளியேற்றப்பட்டனர்.
அமெரிக்காவின் நியூயார்க் நகரில் அமைந்துள்ள லாகார்டியா (LaGuardia) விமான நிலையத்தில் இன்று தரையிறங்கிய ஏர் கனடா எக்ஸ்பிரஸ் விமானம், ஓடுதளத்தில் நின்றிருந்த தீயணைப்பு வாகனத்தின் மீது மோதி பயங்கர விபத்துக்குள்ளானது.
கனடாவின் மாண்ட்ரியல் நகரிலிருந்து புறப்பட்ட CRJ-900 ரக விமானம், ஓடுதளம் 4-இல் தரையிறங்கிய போது எதிர்பாராத விதமாக அங்கு நின்றிருந்த தீயணைப்பு வாகனத்தின் மீது பலமாக மோதியது. இந்த விபத்தில் விமானத்தில் பயணம் செய்த இரண்டு பயணிகள் சம்பவ இடத்திலேயே உயிரிழந்தனர். மேலும், விமானத்தில் இருந்த பயணிகள் மற்றும் ஊழியர்கள் உட்பட பலர் காயமடைந்துள்ளதாக தகவல்கள் வெளியாகியுள்ளன.
இந்த விபத்தின் காரணமாக விமானத்தின் முன்பகுதி கடுமையாகச் சேதமடைந்துள்ளது. விபத்தைத் தொடர்ந்து லாகார்டியா விமான நிலையம் தற்காலிகமாக மூடப்பட்டு, அங்கு வரவேண்டிய அனைத்து விமானங்களும் மற்ற விமான நிலையங்களுக்குத் திருப்பி விடப்பட்டுள்ளன.
காயமடைந்தவர்கள் உடனடியாக அருகிலுள்ள மருத்துவமனைகளில் அனுமதிக்கப்பட்டு சிகிச்சை பெற்று வருகின்றனர். ஓடுதளத்தில் தீயணைப்பு வாகனம் வந்ததற்கான காரணம் குறித்து அதிகாரிகள் தீவிர விசாரணை மேற்கொண்டு வருகின்றனர்.
