இண்டியன்வெல்ஸ் செமிபைனலில் அட்டகாச அல்காரஸ்; சிறப்பான சின்னர்

இண்டியன்வெல்ஸ்: இண்டியன்வெல்ஸ் ஓபன் டென்னிஸ் ஆடவர் ஒற்றையர் காலிறுதிப் போட்டியில் நேற்று, உலகின் முதல் நிலை வீரர் கார்லோஸ் அல்காரஸ், 2ம் நிலை வீரர் ஜானிக் சின்னர் அபார வெற்றி பெற்று அரையிறுதிக்குள் நுழைந்தனர். இண்டியன்வெல்ஸ் ஓபன் டென்னிஸ் போட்டிகள் அமெரிக்காவின் இண்டியன்வெல்ஸ் நகரில் நடந்து வருகின்றன. நேற்று நடந்த ஆடவர் ஒற்றையர் காலிறுதிப் போட்டி ஒன்றில் ஸ்பெயினை சேர்ந்த உலகின் முதல் நிலை வீரர் கார்லோஸ் அல்காரஸ், பிரிட்டன் வீரர் கேமரோன் நோரி மோதினர்.

துவக்கம் முதல் ஆக்ரோஷ ஆட்டத்தை வெளிப்படுத்தி புள்ளிகளை குவித்த அல்காரஸ், 6-3, 6-4 என்ற புள்ளிக் கணக்கில் எளிதில் வென்று அரையிறுதிப் போட்டிக்கு முன்னேறினார். மற்றொரு காலிறுதிப் போட்டியில் இத்தாலியை சேர்ந்த உலகின் 2ம் நிலை வீரர் ஜானிக் சின்னர், அமெரிக்க வீரர் லேர்னர் டியன் மோதினர். இப்போட்டியில் அதிரடி ஆட்டத்தை அரங்கேற்றிய சின்னர், 6-1, 6-2 என்ற நேர் செட்களில் அட்டகாச வெற்றியை பதிவு செய்து அரை இறுதிப் போட்டிக்கு தகுதி பெற்றார். மற்றொரு போட்டியில் ரஷ்ய வீரர் டேனியில் மெத்வதேவ், பிரிட்டன் வீரர் ஜேக் டிரேப்பரை, 6-1, 7-5 என்ற நேர் செட்களில் வெற்றிவாகை சூடி அரையிறுதிக்குள் நுழைந்தார்.

* மகளிர் பிரிவில் எலெனா சாகச ஆட்டம் எளிதில் வீழ்ந்த பெகுலா
இண்டியன்வெல்ஸ் ஓபன் டென்னிஸ் மகளிர் ஒற்றையர் காலிறுதிப் போட்டியில் நேற்று, கஜகஸ்தான் வீராங்கனை எலெனா ரைபாகினா, அமெரிக்க வீராங்கனை ஜெஸிகா பெகுலா உடன் மோதினார். இப்போட்டியில் முதல் செட்டை 6-1 என்ற புள்ளிக் கணக்கில் எலெனா எளிதில் வசப்படுத்தினார். இருப்பினும் 2வது செட்டில் பெகுலா சுதாரித்து ஆடியதால், டைபிரேக்கர் வரை அந்த செட் நீண்டது. இருப்பினும் சாதுரியமாக ஆடிய எலெனா அந்த செட்டையும் 7-6 (7-4) என்ற புள்ளிக் கணக்கில் கைப்பற்றினார். அதனால், 2-0 என்ற செட் கணக்கில் வெற்றிவாகை சூடிய அவர் அரையிறுதிக்குள் நுழைந்தார். மற்றொரு போட்டியில் உக்ரைன் வீராங்கனை எலினா ஸ்விடோலினா, போலந்து வீராங்கனை இகா ஸ்வியடெக்கை, 6-2, 4-6, 6-4 என்ற செட் கணக்கில் வென்று அரை இறுதிக்கு முன்னேறினார்.