கூட்டணி ஒப்பந்தத்தை எல்லோரும் பாராட்டும் வகையில் வெற்றிகரமாக முடித்துவிட்டு வந்துள்ளேன்: முதலமைச்சர் மு.க.ஸ்டாலின் நெகிழ்ச்சி

தஞ்சை: தஞ்சையில் ஓவியா – மனோஜ் தம்பதியின் திருமணத்தை முதலமைச்சர் மு.க.ஸ்டாலின் தலைமையேற்று நடத்தி வைத்தார் . இவ்விழாவில் துர்கா ஸ்டாலின், துணை முதலமைச்சர் உதயநிதி ஸ்டாலின் உள்ளிட்ட தி.மு.க. முக்கிய நிர்வாகிகள் கலந்து கொண்டு மணமக்களை வாழ்த்தினர். தஞ்சையில் அமைச்சர் அன்பில் மகேஸ் இல்லத் திருமண விழாவில் முதலமைச்சர் மு.க.ஸ்டாலின் உரையாற்றினார்.

முதல்வர் உரையில்; ஒரு பள்ளிக் கல்வித்துறை அமைச்சர் எவ்வாறு பணியாற்ற வேண்டும் என்பதற்கு எடுத்துக்காட்டுதான் அன்பில் மகேஸ். நேற்றிரவு வரை கூட்டணி கட்சிகளோடு பேசி ஒப்பந்தத்தை முடித்து விட்டு வந்துள்ளேன். கூட்டணி ஒப்பந்தத்தை எல்லோரும் பாராட்டும் வகையில் வெற்றிகரமாக முடித்துவிட்டு வந்துள்ளேன்.

கூட்டணி கட்சிகளுக்கு 2 மாநிலங்களவை இடங்களை கொடுத்துள்ளோம். காங்கிரஸ் உடனான தொகுதி பங்கீட்டை வெற்றிகரமாக முடித்துள்ளோம். தமிழ்நாடு அரசியல் வரலாற்றில் ஒரே கூட்டணி 4 தேர்தல்களை சந்திப்பது இதுவே முதல்முறை. ஒரு சட்டமன்ற தேர்தலுக்கு அமைந்த கூட்டணி அடுத்த தேர்தலில் நீடித்தது இல்லை என்பதே வரலாறு என கூறினார்.