தஞ்சை: கல்லூரிக்கு செல்வதாக சொல்லிவிட்டுத்தான் சென்றார். ஆனால், விஜயை பார்க்கச் சென்று விபத்தில் சிக்கி மருத்துவமனையில் அனுமதிக்கப்பட்டுள்ளதாக கூறினார்கள் என விஜய் பிரசார வாகனத்தை பின் தொடர்ந்து விபத்தில் சிக்கிய விக்னேஷின் தந்தை வேதனை தெரிவித்துள்ளார். த.வெ.க. தலைவர் விஜய் தஞ்சையில் இன்று த.வெ.க. நிர்வாகிகள் சந்திப்பு மற்றும் தேர்தல் பரப்புரை நிகழ்ச்சியில் கலந்து கொண்டார். போலீசார் எச்சரிக்கையையும் மீறி விஜய் வாகனத்தை தொண்டர்கள் பின்தொடர்ந்து செல்கின்றனர்.
இந்நிலையில் தவெக தலைவர் விஜய்யை பின்தொடர்ந்து சென்ற வாகனங்கள் விபத்தில் சிக்கின. விஜயை பின்தொடர்ந்து இருசக்கர வாகனத்தில் சென்ற இளைஞர்கள் கார் மோதி படுகாயம் அடைந்தனர். இதில் 5 பேர் காயம் அடைந்தனர். விஜய்யின் வாகனத்தை பின்தொடர்ந்து வாகன விபத்தில் சிக்கி காயமடைந்த 5 பேரில் விக்னேஷ் என்ற இளைஞர் கவலைக்கிடமாக உள்ளார். தஞ்சை காமாட்சி மருத்துவமனையில் விக்னேஷ் என்பவருக்கு தீவிர சிகிச்சை அளிக்கப்பட்டு வருகிறது. விபத்தில் சிக்கிய இளைஞர் அருணுக்கு கால் முறிவு ஏற்பட்டுள்ளது.
