சென்னை: தொடர்ந்து அதிரடியாக உயர்ந்து வந்த நிலையில் தங்கம் விலை நேற்று பவுனுக்கு திடீரென ரூ.920 குறைந்தது. இதேபோல வெள்ளி விலையும் கிலோவுக்கு ரூ.10 ஆயிரம் சரிந்தது. தங்கம் விலை கடந்த 3 வாரத்திற்கும் மேலாக ஏற்றம் இறக்கத்துடன் காணப்பட்டு வருகிறது. இதன் ஒரு பகுதியாக கடந்த சனிக்கிழமை தங்கம் விலை காலை, மாலை என ஒரே நாளில் 2 முறை உயர்ந்து அதிர்ச்சியை ஏற்படுத்தியது. அதாவது, காலையில் தங்கம் விலை பவுனுக்கு ரூ.2400க்கும், மாலையில் பவுனுக்கு ரூ.2800 உயர்ந்தது. ஒரு பவுன் ரூ.1,24,400க்கு விற்பனையானது. இதேபோல வெள்ளியும் காலை, மாலை என ஒரே நாளில் கிலோவுக்கு ரூ.25 ஆயிரம் உயர்ந்தது.
இந்நிலையில் நேற்று முன்தினம் வழக்கத்துக்கு மாறாக தங்கம் விலை அதிகரித்ததை காண முடிந்தது. அதாவது ஞாயிற்றுக்கிழமை பங்கு சந்தைகளுக்கு விடுமுறை நாளாகும். ஆனால், ஞாயிற்றுக்கிழமையும் தங்கம் விலை உயர்ந்து நகை வாங்குவோரை கடும் அதிர்ச்சியில் உறைய வைத்தது. ஞாயிற்றுக்கிழமை தங்கம் விலை கிராமுக்கு ரூ.225 உயர்ந்து ஒரு கிராம் ரூ.15,775க்கும், பவுனுக்கு ரூ.1800 உயர்ந்து ஒரு பவுன் ரூ.1 லட்சத்து 26,200க்கும் விற்பனையானது.
ஈரான் மீது அமெரிக்கா, இஸ்ரேல் நடத்திய தாக்குதலே இந்த விலை உயர்வுக்கு காரணமாக கூறப்பட்டது. அதே நேரத்தில் தொடர்ந்து 2 நாட்களில் தங்கம் விலை ரூ.7,000 உயர்ந்தது. இதே போல வெள்ளியும் கிலோவுக்கு ரூ.5 ஆயிரம் உயர்ந்து, பார் வெள்ளி ரூ.3 லட்சத்து 25 ஆயிரத்துக்கும் விற்பனையானது.
இந்த விலை உயர்வு நகை வாங்குவோரை கடும் கலக்கத்தில் ஆழ்த்தியிருந்தது. இன்னும் விலை அதிகரிக்க தான் வாய்ப்பு இருப்பதாக கூறப்பட்டது. இந்நிலையில் யாரும் எதிர்பார்க்காத வகையில் வாரத்தின் தொடக்க நாளான நேற்று தங்கம் விலை திடீரென குறைந்தது. அதாவது நேற்று தங்கம் விலை கிராமுக்கு ரூ.115 குறைந்து, ஒரு கிராம் ரூ.15,660க்கும், பவுனுக்கு ரூ.920 குறைந்து, ஒரு பவுன் ரூ.1,25,280க்கும் விற்பனையானது. இதேபோல வெள்ளி விலையும் குறைந்தது. வெள்ளி விலை கிராமுக்கு ரூ.10 குறைந்து ஒரு கிராம் வெள்ளி ரூ.315க்கும், கிலோவுக்கு ரூ.10 ஆயிரம் குறைந்து பார் வெள்ளி 3 லட்சத்து 15 ஆயிரம் ரூபாய்க்கும் விற்பனையானது. தங்கம் விலை திடீரென குறைந்துள்ளது நகை வாங்குவோருக்கு சற்று ஆறுதலை அளித்துள்ளது.
