சென்னை: தங்கம் விலை ஏற்றம் என்பது கடந்த ஆண்டில் அதிரடியாக இருந்து வந்தது. தொடர்ந்து கடந்த மாதம் 27ம் தேதி ஒரு பவுன் ரூ.1 லட்சத்து 4, 800 என்ற வரலாற்று உச்சத்தை பதிவு செய்தது. இதேபோல வெள்ளி விலையும் எப்போதும் இல்லாத அளவுக்கு ஏற்றத்தை கண்டது. தொடர்ந்து தங்கம் விலை ஏற்றம், இறக்கத்துடன் காணப்பட்டு வருகிறது.
இதற்கிடையில் நேற்று முன்தினம் தங்கம் விலை குறைந்தது. தங்கம் விலை கிராமுக்கு ரூ.50 குறைந்து கிராம் ரூ.12,750க்கும், பவுனுக்கு ரூ.400 குறைந்து ஒரு பவுன் ரூ.1,02,000க்கும் விற்றது. இதே போல வெள்ளி விலையும் குறைந்தது. வெள்ளி விலை கிராமுக்கு ரூ.5 குறைந்து கிராம் ரூ.272க்கும், கிலோவுக்கு ரூ.5,000 குறைந்து பார் வெள்ளி 2 லட்சத்து 72 ஆயிரம் ரூபாய்க்கும் விற்றது.
இந்நிலையில் நேற்று தங்கம் விலை இறங்கிய வேகத்தில் மீண்டும் அதிகரித்தது. அதாவது கிராமுக்கு ரூ.50 அதிகரித்து, ஒரு கிராம் ரூ.12,800க்கும், பவுனுக்கு ரூ.400 உயர்ந்து, ஒரு பவுன் ரூ.1,02,400க்கும் விற்றது. அதே நேரத்தில் வெள்ளி விலையை பொறுத்தவரை நேற்று குறைந்திருந்தது. வெள்ளி விலை கிராமுக்கு ரூ.4 குறைந்து ஒரு கிராம் ரூ.268க்கும், கிலோவுக்கு ரூ.4,000 குறைந்து, பார் வெள்ளி ரூ.2 லட்சத்து 68 ஆயிரத்துக்கும் விற்றது.
