கமல்ஹாசனின் ராஜ்கமல் பிலிம்ஸ் தயாரிக்க, ரஜினிகாந்த் நடிக்கும் ‘தர்மன்’ என்ற படத்தை அஸ்வத் மாரிமுத்து இயக்குகிறார். சமீபத்தில் இப்படத்தின் பர்ஸ்ட் லுக் போஸ்டரை படக்குழு வெளியிட்டது. அனிருத் இசை அமைக்கும் இப்படத்தின் மற்ற தொழில்நுட்ப கலைஞர்கள் மற்றும் நடிகர்கள் குறித்த தகவல் அடுத்தடுத்து வெளியாகும். சிம்ரன் இப்படத்தில் ஒரு முக்கிய வேடத்தில் நடிக்கிறார். முன்னதாக ‘பேட்ட’ படத்தில் ரஜினிகாந்த்துடன் நடித்திருந்தாலும் ‘தர்மன்’ படத்தில் அவருக்கு ஜோடியாக வருகிறார்.
இது குறித்து சிம்ரன் கூறுகையில், ‘சில கனவுகள் நிஜமாக சரியான நேரம் அமைய வேண்டும். ரஜினிகாந்த்துடன் இணைந்து முக்கியமான வேடத்தில் நடிப்பது என் நீண்ட நாள் கனவுகளில் ஒன்று. அது ‘பேட்ட’ படத்தில் நிறைவேறியது. அதில் எனக்கு சிறிய வேடமாக இருந்தாலும் மறக்க முடியாத அனுபவமாக இருந்தது. ஆனால், இன்று ‘தர்மன்’ படத்தில் முக்கியத்துவம் நிறைந்த ஒரு கதாபாத்திரத்தில் அவருடன் மீண்டும் இணைந்து நடிப்பதில் நான் மிகுந்த மகிழ்ச்சி அடைகிறேன். இந்த வாய்ப்பை வழங்கிய ரஜினிகாந்த், கமல்ஹாசன், இயக்குனர் அஸ்வத் மாரிமுத்து, ராஜ்கமல் பிலிம்ஸ் இன்டர்நேஷனல் மற்றும் படக்குழுவினர் அனைவருக்கும் நன்றி.
என் திரைப்பயணம் முழுவதும் எனக்கு மாறாத அன்பையும் ஆதரவையும் வழங்கி வரும் என் ரசிகர்கள், பத்திரிகையாளர்கள் மற்றும் ஊடக நண்பர்கள் அனைவருக்கும் என் இதயப்பூர்வமான நன்றியை தெரிவித்துக்கொள்கிறேன். அவர்களது ஊக்கம்தான் ஒவ்வொரு புதிய அத்தியாயத்தையும் உற்சாகத்துடன் தொடங்க எனக்கு உதவுகிறது. ‘கேளுங்கள், நம்புங்கள், இந்த பிரபஞ்சம் நீங்கள் நினைக்காத விதத்தில் பதிலளிக்கும்’ என்பதில் எனக்கு எப்போதும் நம்பிக்கை உண்டு. நன்றியும், மகிழ்ச்சியும் நிறைந்த மனதுடன் இந்த அழகான புதிய அத்தியாயத்தில் அடியெடுத்து வைக்கிறேன்’ என்று தெரிவித்துள்ளார்.
