சென்னை: நடிகரும், தயாரிப்பாளருமான விஷால், தமிழ் மற்றும் தெலுங்கில் ‘மகுடம்’ என்ற படத்தை இயக்கி முடித்துள்ளார். முதலில் இப்படத்தை ‘ஈட்டி’, ‘ஐங்கரன்’ ஆகிய படங்களின் இயக்குனர் ரவி அரசு எழுதி இயக்கி வந்தார். ஆனால், படப்பிடிப்பில் ஏற்பட்ட கருத்து வேறுபாடுகளின் காரணமாக அவர் வெளியேறினார். பிறகு விஷால் இயக்கி நடித்துள்ளார். இதில் துஷாரா விஜயன், அஞ்சலி, யோகி பாபு உள்பட பலர் நடித்துள்ளனர்.
ஆக்ஷன், எமோஷன் கலந்த விறுவிறுப்பான படமாக உருவாகும் இதை மறைந்த தயாரிப்பாளர் ஆர்.பி.சவுத்ரியின் சூப்பர் குட் பிலிம்ஸ் தயாரித்துள்ளது. ஜி.வி.பிரகாஷ் குமார் இசை அமைத்துள்ளார். படம் குறித்து பேசிய விஷால், ‘கடந்த 30 வருடங்களாக எனக்குள் இருந்த கனவு ஒன்று இப்போது நிஜமாகி இருக்கிறது. நாகார்ஜூனா நடிப்பில் ராம் கோபால் வர்மா இயக்கிய `சிவா’ என்ற படத்தை பார்த்துவிட்டு, எதிர்காலத்தில் நான் திரைப்பட இயக்குனராக வேண்டும் என்று முடிவு செய்திருந்தேன். அது இப்போது நிஜமாகி இருக்கிறது’ என்றார்.
