மும்பை: இந்திய திரைத்துறையை பொறுத்தவரையில் திரைப்பட நடிகர், நடிகைகளின் சம்பள விஷயத்தில் நிறைய ஏற்றத்தாழ்வுகள் இருக்கிறது. இது உடனே மாற்றப்பட வேண்டும் என்று காஜல் அகர்வால் கோரிக்கை விடுத்துள்ளார். அவரது கருத்து இணையதளங்களில் வைரலாகி வருகிறது.

இதுபற்றி அவர் அளித்துள்ள பேட்டியில் கூறியிருப்பதாவது:
திரையுலகில் நடிகர், நடிகைகளுக்கு இடையே காணப்படும் சம்பள பாகுபாடுகள் குறித்து தொடர்ந்து கடுமையான விவாதங்கள் நடந்து வருகிறது. இதுகுறித்து மேலும் பலர் பேசுவார்கள் என்று நம்புகிறேன். சம்பள விஷயத்தில் பாகுபாடுகள் இல்லை என்று சொல்ல முடியாது. இது உடனே மாற வேண்டும். ஆங்காங்கே சில மாற்றங்கள் நடந்து வருகிறது. இன்றுள்ள திரைத்துறை கார்ப்பரேட் மயமாகிவிட்டது. இது ஆட்டத்தின் விதிகளை மாற்றியுள்ளது. நடிகர், நடிகைகளின் சம்பளத்துக்கு இடையே இருக்கும் வித்தியாசங்கள் அதிகமாகிவிட்டது.

எனக்கு தென்னிந்திய திரைத்துறை மீது அதிக ஈர்ப்பு இருக்கிறது. காரணம், அங்குதான் திரைப்பயணத்தை தொடங்கினேன். அங்கு 9 மணி நேரத்துக்கு மேல் பணியாற்றுவது இல்லை. இந்தி படவுலகில் எனக்கு கிடைக்காத பல்வேறு வசதிகள், தென்னிந்திய திரையுலகில் கிடைத்து வருகிறது. அங்கு படப்பிடிப்பில் காணப்படும் ஒழுக்கம், சரியான நேரத்தை பின்பற்றுவது, பெண்களுக்கு அதிகமாக மரியாதை கொடுப்பது போன்ற விஷயங்களை குறிப்பிடலாம்.