சென்னை: மங்கி மைண்ட்ஸ் எண்டர்டெயின்மெண்ட் சார்பில் சிவகுமார் தயாரித்துள்ள படம், ‘லவ் 3.0’. ராஜேஷ் வி.கே எழுதி இயக்கியுள்ளார். வேதை பா.மகேஷ் ஒளிப்பதிவு செய்ய, வைகுந்த் சீனிவாசன் இசை அமைத்துள்ளார். அரவிந்த் எடிட்டிங் செய்ய, ஜேபி அரங்கம் அமைத்துள்ளார். இன்ஸ்டாகிராமில் ‘ரீல்ஸ் அக்கா’ என்று பிரபலமான அரனிகா ஹீரோயினாக நடிக்கிறார். இவர், ஜி.வி.பிரகாஷ் குமார் நடித்த முதல் படத்தில் ஹீரோயினாக நடித்தவர். அப்படம் ரிலீசாகவில்லை. இன்ஸ்டா பிரபலம் கோயமுத்தூர் மாப்ள, கார்த்திகேயன் கே.என் ஸ்மைலி ஹீரோக்களாக நடித்துள்ளனர். இப்படம் சம்பந்தமான நிகழ்ச்சியில், பர்ஸ்ட் லுக்கை தயாரிப்பாளர் எஸ்.சவுந்தரபாண்டியன் வெளியிட்டார். இவர் விஜய், அஜித் குமார் இணைந்து நடித்த ‘ராஜாவின் பார்வையிலே’ என்ற படத்தை தயாரித்தவர். மற்றும் ‘சம்பவம்’ இயக்குனர் ரஞ்சித் குமார், பாடலாசிரியர் சொற்கோ பங்கேற்றனர். அரனிகா பேசுகையில், ‘இன்றைய தலைமுறையினரின் காதலை பற்றி பேசும் இப்படம் அனைவருக்கும் பிடிக்கும் என்று நம்புகிறேன்’ என்றார்.