சென்னை: நடிகர் கவுதம் ராம் கார்த்திக் நாயகனாக நடிக்கும் படம் ‘ரூட்’. இப்படத்தினை சூரியபிரதாப் இயக்கியுள்ளார். பவ்யா திரிகா, பாலிவுட் நடிகர் அபார்ஷக்தி குரானா, ஒய்.ஜி.மகேந்திரன் நடிக்கின்றனர். வெரஸ் நிறுவனம் சார்பில் ஷேக் முஜீப், சஞ்சய் சங்கர், ராஜராஜன் ஞானசம்பந்தம், தனிஷ்தன் பெர்னாண்டோ இணைந்து தயாரித்துள்ளனர். சயின்ஸ் ஃபிக்‌ஷன் கலந்த க்ரைம் திரில்லர் படமாக இது உருவாகியுள்ளது. படம் குறித்து சூரியபிரதாப் கூறியது: ரூட் என்பது ரன்னிங் அவுட் ஆஃப் டைம் என்பதன் சுருக்கம். இதில் கவுதம் ராம்கார்த்திக் போலீஸ் அதிகாரியாக நடிக்கிறார். தொடர் கொலைகள் நடக்க ஆரம்பிக்கும்போது அதை செய்வது சீரியல் கில்லர் என்பது தெரிகிறது. அந்த கொலையாளியை கவுதம் ராம் கார்த்திக் எப்படி பிடிக்கிறார் என்பதை படு சுவாரஸ்யமாக படம் சொல்கிறது. இதில் வடநாட்டை சேர்ந்தவராகவே அபார்ஷக்தி குரானா நடித்திருக்கிறார்.

அவரே தமிழில் டப்பிங்கும் பேசியுள்ளார். இந்த கதைக்கு முன்பாக ஒரு வெப்சீரிஸ் இயக்கினேன். அது சில காரணங்களால் ரிலீஸ் தள்ளிப்போயுள்ளது. இதற்கு முன் சவுந்தர்யா ரஜினி மேடத்திடம் உதவி இயக்குனராக பணியாற்றினேன். இந்த படம் அனைத்து தரப்பு ரசிகர்களையும் கவரும் என்றார். தயாரிப்பாளர் ஷேக் முஜீப் கூறும்போது, ‘‘தொழில்நுட்ப தரத்தில் இந்த படம் பெரும் தரமான படைப்பாக இருக்கும். எடிட்டிங், விஎப்எக்ஸ், சவுண்ட் என அனைத்து துறையிலும் கவனம் பெறும் படமாக ரூட் இருக்கும். இதில் பணியாற்றியுள்ள தொழில்நுட்ப கலைஞர்கள் பெரும்பாலும் புதியவர்கள்தான்’’ என்றார்.