வடிவேலு பிசியாக நடித்து வந்த காலத்தில், ‘இளையராஜாவின் மோதிரம்’ என்ற பெயரில் ஒரு படத்தில் கதையின் நாயகனாக நடிப்பதாக அறிவிப்பு வந்ததோடு சரி. அதற்கு பிறகு அப்படம் உருவாகவில்லை. தற்போது இளையராஜா வாழ்க்கை வரலாறு, ‘இளையராஜா’ என்ற பெயரில் உருவாகும் என்று, கடந்த 2024 மார்ச் மாதம் அறிவிக்கப்பட்டது. இளையராஜா கேரக்டரில் தனுஷ் நடிப்பார் என்றும், ‘கேப்டன் மில்லர்’ என்ற படத்தில் தனுஷை இயக்கிய அருண் மாதேஸ்வரன் இப்படத்தை இயக்குவார் என்றும் தெரிவிக்கப்பட்டது. இதனால் ரசிகர்களிடம் அதிக எதிர்பார்ப்பு ஏற்பட்டது. ஆனால், திடீரென்று இப்படம் கைவிடப்பட்டதாக தகவல்கள் வெளியாகி வருகிறது.

தற்போது அருண் மாதேஸ்வரன் இயக்கத்தில், டைரக்டர் லோகேஷ் கனகராஜ் ஹீரோவாக அறிமுகமாகும் ‘டிசி’ என்ற படம் உருவாகி வருகிறது. இதனால், ‘இளையராஜா’ பயோபிக்கில் இருந்து அருண் மாதேஸ்வரன் விலகியதாக கூறப்பட்டது. அதை நேற்று படக்குழு மறுத்துள்ளது. இதுகுறித்து தனுஷ் தரப்பில் வெளியிடப்பட்ட பதிவில், ‘இளையராஜா பயோபிக்கை அருண் மாதேஸ்வரன் இயக்க மாட்டார் என்று சமூக வலைத்தளங்களில் உலா வரும் தகவல்கள் உண்மை இல்லை. லோகேஷ் கனகராஜ் நடிக்கும் ‘டிசி’ படத்தின் ரிலீசை தொடர்ந்து, ரசிகர்கள் மிகவும் எதிர்பார்க்கும் இளையராஜா பயோபிக் உருவாகும். அதை அருண் மாதேஸ்வரன் இயக்குவார். இப்படத்தை பற்றிய அப்டேட்டுகள் விரைவில் வெளியாகும்’ என்று கூறப்பட்டுள்ளது. இதனால் இளையராஜா மற்றும் தனுஷ் ரசிகர்கள் நிம்மதி அடைந்துள்ளனர்.