மும்பை: பாலிவுட் முன்னணி நடிகை திஷா பதானி, தமிழில் ‘சிறுத்தை’ சிவா இயக்கத்தில் வெளியான ‘கங்குவா’ என்ற படத்தில் சூர்யா ஜோடியாக நடித்திருந்தார். இந்தியை தொடர்ந்து தென்னிந்திய மொழிப் படங்களில் கோடிக்கணக்கில் சம்பளம் வாங்கி நடித்து வரும் திஷா பதானியும், பிரபல பாடகர் தல்வீந்தரும் காதலித்து வருவதாகவும், இருவரும் பல இடங்களில் டேட்டிங் செய்து வருவதாகவும் தகவல்கள் வெளியானது. இதுபற்றி பேசிய தல்வீந்தர், ‘நாங்கள் ஒருவரை ஒருவர் சோதனை செய்து வருகிறோம். ஆனால், ஆதாரமற்ற வதந்திகளை பலர் பரப்புகின்றனர்.

அதெல்லாம் வதந்திகளாகவே இருக்க வேண்டும் என்று நான் அனுமதிக்கிறேன்’ என்றார். அவரிடம், ‘திஷா பதானியை காதலிக்கிறீர்களா, இல்லையா?’ என்று கேட்டபோது, ‘நான் ஒவ்வொரு நாளும் காதலிக்கிறேன். இப்போதும் காதலிக்கிறேன்’ என்று பதிலளித்தார். இதன்மூலம் திஷா பதானியை காதலிப்பது குறித்து உறுதியாக சொல்லாமல், விஷயத்தை ஏற்கவும், மறுக்கவும் முடியாத வகையில் தல்வீந்தர் மழுப்பலாக பதிலளித்தார். திஷா பதானியும் இதுகுறித்து எதுவும் பதில் சொல்லவில்லை.