சென்னை: சிவாஜி கணேசனின் ‘வசந்த மாளிகை’, ரஜினிகாந்தின் ‘தனிக்காட்டு ராஜா’ படங்கள் டிசம்பரில் ரீ ரிலீசாகின்றன. சிவாஜி, வாணி ஜோடியாக நடித்து 1972ல் வெளியான வெள்ளி விழா படம் ‘வசந்த மாளிகை’. கே.வி.மகாதேவன் இசையில், ‘மயக்கமென்ன’, ‘ஒரு கிண்ணத்தை’, ‘யாருக்காக’, ‘குடிமகனே’ உள்ளிட்ட பாடல்கள் இதில் இடம்பெற்றன. ராமநாயுடு தயாரித்து, டி.பிரகாஷ் ராவ் இயக்கத்தில் பாலமுருகன் வசனத்தில் உருவான இப்படம் இதற்கு முன் 2 முறை ரீ ரிலீசாகி வெற்றி பெற்றுள்ளது. இப்போது 3வது முறை ரீரிலீசாகிறது.
இதேபோல் ரஜினிகாந்த் நடிப்பில் வி.சி.குகநாதன் எழுதி, இயக்கிய ‘தனிக்காட்டு ராஜா’ படம் 42 வருடங்களுக்கு பிறகு ரீரிலீசாகிறது. இந்த இரு படங்களையும் கோவை வினியோகஸ்தர்கள் சங்கத் தலைவர் தம்பிதுரை வெளியிடுகிறார். 1982ல் டி.ராமநாயுடு தயாரித்த ‘தனிக்காட்டு ராஜா’ படத்தில் ரஜினிகாந்த், ஸ்ரீதேவி, ஸ்ரீபிரியா, ஜெய்சங்கர், தேங்காய் சீனிவாசன், ஆர்.எஸ்.மனோகர், சில்க் ஸ்மிதா, வெண்ணிறஆடை மூர்த்தி உள்பட பலர் நடித்தனர். இந்த இரு படங்களையும் டிஜிட்டலில் 4கே மற்றும் 7.1 ஒலிக்கு மாற்றி வரும் டிசம்பரில் ரீ ரிலீஸ் செய்கிறார்கள். ‘இது தவிர மேலும் சில படங்களை அடுத்தடுத்து ரீரிலீஸ் செய்ய திட்டமிட்டுள்ளேன். இப்போது பழைய படங்கள் மீண்டும் திரைக்கு வரும்போது, ரசிகர்கள் அதை கொண்டாடுகிறார்கள். அந்த வகையில் மேலும் சில பிரபலமான படங்களை வெளியிட உள்ளேன்’ என தம்பிதுரை தெரிவித்தார்.
