சேலம்: வர்த்தக காஸ் சிலிண்டர் விலை இம்மாதம் ரூ.15.50 குறைக்கப்பட்டுள்ளது. இதனால், சென்னையில் ரூ.1,906க்கு விற்கப்படுகிறது. காஸ் சிலிண்டர் விலை மாதந்தோறும் 1ம் தேதி மாற்றியமைக்கப்படுகிறது. 14.2 கிலோ வீட்டு உபயோக காஸ் சிலிண்டர் விலையில் கடந்த மாதம் 8ம் தேதி திடீரென ரூ.50 அதிகரிக்கப்பட்டது. இதனால், சென்னையில் ரூ.868.50, சேலத்தில் ரூ.886.50 என விலை நிர்ணயிக்கப்பட்டது. இந்நிலையில், நடப்பு மாதத்திற்கான (மே) புதிய விலை பட்டியலை நேற்று அதிகாலை எண்ணெய் நிறுவனங்களின் கூட்டமைப்பு வெளியிட்டது. அதில், வீட்டு உபயோக காஸ் சிலிண்டர் விலையில் மாற்றத்தை ஏற்படுத்தவில்லை.

அதே வேளையில், 19 கிலோ எடை கொண்ட வர்த்தக காஸ் சிலிண்டர் விலை ரூ.14.50 முதல் ரூ.17 வரை குறைக்கப்பட்டுள்ளது. கடந்த மாதம் வர்த்தக காஸ் சிலிண்டரின் விலை சென்னையில் ரூ.1,921.50 என இருந்த நிலையில், ரூ.15.50 குறைந்து ரூ.1,906 ஆக நிர்ணயிக்கப்பட்டுள்ளது. சேலத்தில் ரூ.1,870.50ல் இருந்து ரூ.16 குறைந்து ரூ.1,854.50 ஆக நிர்ணயம் செய்யப்பட்டுள்ளது. இதே போல், டெல்லியில் ரூ.14.50 குறைந்து ரூ.1,747.50 ஆகவும், மும்பையில் ரூ.14.50 குறைந்து ரூ.1,699 ஆகவும், கொல்கத்தாவில் ரூ.17 குறைந்து ரூ.1,851.50 ஆகவும் விலை நிர்ணயம் செய்யப்பட்டுள்ளது.

 

The post வர்த்தக காஸ் சிலிண்டர் விலை ரூ.15.50 குறைப்பு: சென்னையில் ரூ.1,906க்கு விற்பனை appeared first on Dinakaran.