சென்னை: பாரதிராஜாவின் மகன் மனோஜ் உடல் பெசன்ட் நகர் மின்மயானத்தில் தகனம் செய்யப்பட்டது. இயக்குனரும், தயாரிப்பாளரும், நடிகருமான பாரதிராஜா, சந்திரலீலா தம்பதியின் மகன் மனோஜ், மகள் ஜனனி. கடந்த 1976 செப்டம்பர் 11ம் தேதி பிறந்த மனோஜுக்கு 48 வயதாகிறது. திடீரென்று ஏற்பட்ட உடல்நலக்குறைவு காரணமாக சென்னை மருத்துவமனையில் அனுமதிக்கப்பட்ட அவரை பரிசோதித்த டாக்டர்கள், உடனே இதய அறுவை சிகிச்சை செய்ய வேண்டும் என்றார்கள். இதையடுத்து கடந்த வாரம் சென்னை அமைந்தகரையில் இருக்கும் மருத்துவமனையில் மனோஜுக்கு இதய அறுவை சிகிச்சை நடந்தது.

இந்நிலையில், சென்னை சேத்பட் ஹாரிங்டன் ரோட்டிலுள்ள வீட்டில் இருந்த மனோஜுக்கு நேற்றிரவு மாரடைப்பு ஏற்பட்டு திடீரென்று மரணம் அடைந்தார். அவரது மறைவுச்செய்தி பேரதிர்ச்சியை ஏற்படுத்தியுள்ளது. பல்வேறு தரப்பினர் இரங்கல் தெரிவித்து வருகின்றனர். மனோஜ் தனது சிறுவயதில் தனது தந்தை பாரதிராஜா இயக்கிய சில படங்களில் குழந்தை நட்சத்திரமாக நடித்தார். நடிப்பு மற்றும் இசையார்வம் கொண்ட அவர், தெற்கு புளோரிடா பல்கலைக்கழகத்தில் திரைப்பட இயக்கம் மற்றும் தயாரிப்பு குறித்த படிப்பை முடித்தார். பிறகு சென்னைக்கு வந்த அவர், இயக்குனர் மணிரத்னத்தின் படங்களிலும், பாரதிராஜா இயக்கிய படங்களிலும் உதவி இயக்குனராக பணியாற்றினார்.

பிறகு ஷங்கர் இயக்கத்தில் ரஜினிகாந்த் நடித்த ‘எந்திரன்’ படத்தில் உதவி இயக்குனராக பணியாற்றினார். கடந்த 1999ல் பாரதிராஜா இயக்கிய ‘தாஜ்மஹால்’ என்ற தமிழ் படத்தின் மூலம் நடிகராக அறிமுகமான மனோஜ், தொடர்ந்து சமுத்திரம், கடல் பூக்கள், அல்லி அர்ஜூனா, வருஷமெல்லாம் வசந்தம், பல்லவன், ஈர நிலம், மகா நடிகன், சாதுரியன், அன்னக்கொடி, பேபி, கதிர்வேல் காக்க, என்னமா… கத வுடுறானுங்க…!, வாய்மை, சாம்பியன், ஈஸ்வரன், மாநாடு, விருமன் ஆகிய படங்களில் நடித்தார். ஹீரோவாகவும், குணச்சித்திர வேடங்களிலும், வில்லனாகவும் நடித்த அவர், ‘தாஜ்மஹால்’ படத்தில் ஏ.ஆர்.ரஹ்மான் இசையில் பாடியிருந்தார். திரைப்படம் இயக்க வேண்டும் என்பதற்காக நடிப்பை குறைத்துக்கொண்ட மனோஜ், பாரதிராஜா இயக்கத்தில் வெளியான ‘சிகப்பு ரோஜாக்கள்’ படத்தை ரீமேக் செய்து இயக்குனராக திட்டமிட்டார்.

ஆனால், அப்படம் ஆரம்ப நிலையிலேயே கைவிடப்பட்டது. பிறகு 2023 அக்டோபர் 27ம் தேதி வெளியான ‘மார்கழி திங்கள்’ என்ற தமிழ் படத்தின் மூலம் ‘மனோஜ் பாரதிராஜா’ என்ற பெயரில் இயக்குனராக அறிமுகமானார். இதில் ஷ்யாம் செல்வன், ரக்‌ஷணாவுடன் பாரதிராஜாவும் நடித்திருந்தார். கடந்த 2005 நவம்பர் 19ம் தேதி தனது காதலியும், நடிகையுமான நந்தனாவை திருமணம் செய்த மனோஜுக்கு ஹர்ஷிதா, மதிவதனி ஆகிய 2 மகள்கள் இருக்கின்றனர். மலையாள நடிகையான நந்தனா, தமிழில் சில படங்களில் நடித்துள்ளார். ‘சாதுரியன்’ படத்தில் இணைந்து நடித்தபோது மனோஜும், நந்தனாவும் காதலித்தனர். மனோஜ் மறைவுக்கு முதல்வர் மு.க.ஸ்டாலின் இரங்கல் தெரிவித்துள்ளார்.

இந்நிலையில் நீலாங்கரையில் உள்ள பாரதிராஜா வீட்டில் மனோஜ் உடல் அஞ்சலிக்காக வைக்கப்பட்டது. நடிகர்கள் விஜய், சூர்யா, சரத்குமார், இயக்குனர் மணிரத்னம் உள்பட திரையுலகினர் இறுதி அஞ்சலி செலுத்தினர். பொதுமக்களும் திரளாக வந்து அஞ்சலி செலுத்தினர். தொடர்ந்து மனோஜ் உடல் பெசன்ட் நகர் மின்மயானத்தில் தகனம் செய்யப்பட்டது.

The post ‘எங்கே அந்த வெண்ணிலா..’ மறைந்த நடிகர் மனோஜ் பாரதிராஜா உடல் தகனம் appeared first on Dinakaran.