மதுராந்தகம்: மதுராந்தகம் மற்றும் செய்யூரை சுற்றியுள்ள கிராமங்களில் மதுவிலக்கு சட்டம் குறித்து விழிப்புணர்வு சுவரொட்டிகள் ஒட்டப்பட்டுள்ளன. மதுராந்தகம் மதுவிலக்கு அமல் பிரிவு போலீசாரால், கள்ளச் சந்தையில் மது விற்பது, வெளிமாநிலங்களில் இருந்து மதுவை கடத்தி வருவது, பனை மற்றும் தென்னை மரங்களில் கள் இறக்குவது போன்ற குற்ற செயல்களில் ஈடுபடுவோருக்கு திருத்தப்பட்ட 2024ம் ஆண்டு மதுவிலக்கு சட்டப்படி கடுமையான தண்டனைகள் வழங்கப்படும் என மதுராந்தகம் சுற்றியுள்ள பல்வேறு பகுதிகளில் சுவரொட்டிகள் ஒட்டப்பட்டுள்ளன. செங்கல்பட்டு மாவட்ட காவல் கண்காணிப்பாளர் சாய் பிரனித் உத்தரவின்பேரில், டிஎஸ்பி வேல்முருகன், இன்ஸ்பெக்டர் மங்கல பிரியா, தலைமையிலான காவல்துறையினர் பணிகளை மேற்கொண்டு வருகின்றனர்.

குறிப்பாக, பனைமரம் அதிகமாக உள்ள பகுதிகளில் பொதுமக்கள் பார்வையில் படும்படியாக தண்டனை குறித்த விவரங்கள் அடங்கிய சுவரொட்டிகள் ஒட்டப்பட்டுள்ளன. ஓதியூர், கடப்பாக்கம், எல்லையம்மன் கோவில், செய்யூர், கொளத்தூர் செக் போஸ்ட், சூனாம்பேடு, புத்திரன் கோட்டை, பவுஞ்சூர், தச்சூர், ஒரத்தி, குன்னத்தூர், பவுந்தங்கரனை, ஈசூர், வேப்பங்கரணை, அம்மனூர், பனையூர் ஆகிய கிராமங்களில் உள்ள கிராம நிர்வாக அலுவலகங்கள், பேருந்து நிலையங்கள், மருத்துவமனைகள், ஒயின்ஷாப்புகள், மார்க்கெட் பகுதிகள், காவல் நிலையங்கள் உள்ளிட்ட பகுதிகளில் ஒட்டப்பட்டுள்ளது. இதனால், குற்ற செயலில் ஈடுபடுபவருக்கும், பொதுமக்களுக்கும் விழிப்புணர்வு ஏற்படுத்தப்பட்டு வருகிறது.

The post மதுராந்தகம் சுற்று வட்டார பகுதிகளில் மதுவிலக்கு சட்ட விழிப்புணர்வு சுவரொட்டிகள் appeared first on Dinakaran.