பரமத்திவேலூர், ஜன.5: வேலகவுண்டம்பட்டியில், டாஸ்மாக் கடை அருகே வாலிபரை வெட்டி கொன்ற வழக்கில், 5 பேர் கும்பலை போலீசார் கைது செய்தனர். நாமக்கல் மாவட்டம், வேலகவுண்டம்பட்டி அருகே உள்ள சிங்கிலிபட்டி கிராமத்தை சேர்ந்தவர் சஞ்சய் (22). இவர் கோவையில் உள்ள தனியார் நிறுவனத்தில் பணிபுரிந்து வந்தார். ஆங்கில புத்தாண்டு விடுமுறைக்காக, சொந்த ஊருக்கு வந்த சஞ்சய், கடந்த 3 தினங்களுக்கு முன்பு வேலகவுண்டம்பட்டியில் உள்ள டாஸ்மாக் கடைக்கு சென்றுள்ளார்.
அப்போது அங்கு வந்த சிலர் அவரை சரமாரியாக வெட்டியதில், சஞ்சய் சம்பவ இடத்திலேயே உயிரிழந்தார். அவரை கொலை செய்தவர்கள் அங்கிருந்து தப்பி ஓடிவிட்டனர். தப்பியோடிய நபர்களை பிடிக்க, பரமத்திவேலூர் டிஎஸ்பி சங்கீதா தலைமையில், இன்ஸ்பெக்டர்கள் செல்வராஜ், இந்திராணி, ராமகிருஷ்ணன் ஆகியோர் கொண்ட தனிப்படையினர், தீவிரமாக தேடி வந்தனர். இந்நிலையில், நேற்று முன்தினம் சந்தேகத்தின் அடிப்படையில், 5 பேரை பிடித்து விசாரணை நடத்தினர்.
இதில் சஞ்சயை கொலை செய்த நாமக்கல் மாவட்டம், புத்தூர் கிழக்கு தெருவை சேர்ந்த சண்முகம் மகன் சூர்யா (26), வேலகவுண்டம்பட்டி அருகே உள்ள பெருகாம்பாளையத்தை சேர்ந்த சக்திவேலனின் 17 வயது மகன், முதலைப்பட்டி, செல்லிபாளையத்தை சேர்ந்த தினேஷ் (32), வேலகவுண்டம்பட்டி அருகே உள்ள சிங்கிலிபட்டியை சேர்ந்த சரவணன் மகன் சஞ்சய் (19), மரூர்பட்டி, கந்துக்கார தோட்டத்தை சேர்ந்த கட்டிட மேஸ்திரி சங்கர் (39) உள்ளிட்ட 5 பேரை கைது செய்தனர். அவர்களை நாமக்கல் நீதிமன்றத்தில் ஆஜர்படுத்தி, 17 வயது சிறுவனை சேலம் கூர்நோக்கு இல்லத்திலும், மற்ற 4 பேரை சேலம் மத்திய சிறையிலும் அடைத்தனர்.
The post வாலிபரை வெட்டி கொன்ற 5 பேர் கும்பல் அதிரடி கைது appeared first on Dinakaran.
