நெல்லை: செல்போனில் மூளையை மழுங்கடிக்கும் ஆன்லைன் கேம்தான் ‘ப்ரி பையர்’ விளையாட்டு. அந்த விளையாட்டில் சக நண்பர்களுடன் சேர்ந்து எதிரியை சுட்டு வீழ்த்துவதும், வெடிகுண்டுகளை வீசுவதுமாக மணிக்கணக்கில் இன்றைய இளைஞர்கள் பலர் நேரத்தை வீணடிக்கின்றனர். அந்த விளையாட்டில் ஆர்வம் கொண்டவர் நெல்லை டவுனை சேர்ந்த சண்முகராஜா (25). இவர் அடிக்கடி அவரது நண்பர்கள் மற்றும் அந்த பகுதியைச் சேர்ந்த வாலிபர்களுடன் சேர்ந்து ஆன்லைனில் ‘ப்ரி பையர்’ விளையாடி வருவதாகக் கூறப்படுகிறது. இவரும், அதே பகுதியைச் சேர்ந்த ஹரிஷ் என்பவரும் செல்போனில் ‘ப்ரி பையர் கேம் விளையாடியதாகவும், அப்போது அவர்களுக்குள் ஆன்லைனில் தகராறு ஏற்பட்டதாகவும் கூறப்படுகிறது.

இதனால் ஆத்திரமடைந்த சண்முகராஜா நேற்று முன்தினம் நள்ளிரவு, அவரது நண்பர் நிசாஷ் என்பவருடன் சேர்ந்து ஹரிஷ் வீட்டிற்கு அருகே சென்று ரகளையில் ஈடுபட்டு உள்ளார். மிரட்டுவதற்காகவும், கெத்து காண்பிப்பதற்காகவும் மதுபாட்டிலில் பெட்ரோலை நிரப்பி அவரது வீட்டிற்கு அருகே நின்று, ப்ரி பயர் கேமில் விளையாடுவது போன்று ஹரிஷ் வீட்டு சுவர் மீது பெட்ரோல் குண்டை வீசியுள்ளனர். அது பயங்கர சத்தத்துடன் வெடித்ததால் இருவரும் தப்பியோடினர். இதுகுறித்து தகவல் அறிந்த மாநகர போலீசார் சென்று விசாரணை நடத்தி, சண்முகராஜாவை நேற்று கைது செய்தனர். தலைமறைவாக உள்ள நிசாஷை தேடி வருகின்றனர்.

The post ப்ரி பையர் விளையாட்டில் தகராறு பெட்ரோல் குண்டு வீசிய வாலிபர் கைது appeared first on Dinakaran.