மும்பை: ராஜஸ்தானை சேர்ந்த 5ம் வகுப்பு படிக்கும் சிறுமி அனாயாசமாக அசுர வேகத்தில் பந்து வீசும் வீடியோவை கண்டு கிரிக்கெட் ஜாம்பவான் சச்சின் டெண்டுல்கர் டிவிட்டரில் வெளியிட்ட பதிவு நெட்டிசன்கள் மத்தியில் ஆச்சரிய அலைகளை ஏற்படுத்தி உள்ளது. ராஜஸ்தானில் ஒரு கிராமத்தை சேர்ந்த சிறுமி சுசீலா மீனா. அங்குள்ள பள்ளியில் 5ம் வகுப்பு படிக்கிறார். கிரிக்கெட்டில் அதீத ஆர்வமுள்ள அவர், இடதுகை வேகப்பந்து வீச்சில் அபார திறனுள்ளவராக உருவெடுத்துள்ளார். இவர் இடது கையில் பந்தை இறுகப் பற்றியபடி அசுர வேகத்தில் ஓடி வந்து கோட்டுக்கு சில மீட்டர் துாரம் இருக்கும்போது இரண்டு அடி உயர பறந்தவாறே பந்தை அனாயசமாக ரிலீஸ் செய்து விக்கெட்டை நோக்கி வீசும் காட்சியை ஒருவர் கேமிராவில் பதிவு செய்து இணையத்தில் வெளியிட்டுள்ளார்.

அந்த காட்சியை பார்ப்பவர் யாராக இருந்தாலும் அந்த நொடியே சுசீலாவின் அற்புத திறனை உடனே புரிந்து கொள்வர். கிரிக்கெட் ஜாம்பவான் சச்சின் டெண்டுல்கரும் அந்த வீடியோவை கண்டு மெய் சிலிர்த்துள்ளார். உடனே அந்த வீடியோவை தன் டிவிட் பக்கத்தில் பகிர்ந்ததோடு, முன்னாள் கிரிக்கெட் வேகப்பந்து வீச்சாளர் ஜாகீர் கானையும் ‘டேக்’ செய்துள்ளார். ‘என்ன ஒரு திறமை? அனாயசமான பந்து வீச்சு. பார்க்கவே பிரமிப்பாக உள்ளது. சுசீலாவின் பந்து வீச்சு, உங்கள் சாயலில் உள்ளது. நீங்களும் பார்த்தீர்களா? என, ஜாகீர் கானிடம் சச்சின் கேள்வி எழுப்பி உள்ளார்.

சச்சினின் பதிவுக்கு பதில் கூறியுள்ள ஜாகீர், ‘ சரியாக சொன்னீர்கள். இதற்கு மேல் நான் சொல்வதற்கு ஏதுமில்லை. அவரது திறன் என்னை திகைக்க வைத்துள்ளது. எதிர்காலத்தில் சிறப்பான சாதனை புரிவார்’ எனத் தெரிவித்துள்ளார். இந்த இருவரின் டிவிட்கள் நெட்டிசன்கள் மத்தியில் ஆச்சரிய அலைகளை ஏற்படுத்தியதோடு, சுசீலாவின் பந்து வீச்சு வீடியோவை லட்சக்கணக்கானோர் பகிர்ந்து வருகின்றனர்.

The post ஜாகீர் கானை போல் பந்து வீசும் சிறுமியின் சாகசம்: சச்சின் பரவசம்; வீடியோ வைரல் appeared first on Dinakaran.