சிவகங்கை, நவ. 30: சமூக நீதிக்காக பாடுபடுபவர்களை சிறப்பு செய்வதற்காக, தந்தை பெரியார் விருது 1995ம் ஆண்டு முதல் தமிழக அரசால் வழங்கப்பட்டு வருகிறது. இந்த விருது பெறுவோருக்கு ரூ.5 லட்சம், ஒரு சவரன் தங்கப்பதக்கம் வழங்கப்படுகிறது. 2024ம் ஆண்டிற்கான தமிழக அரசின் சமூக நீதிக்கான தந்தை பெரியார் விருது பெறுவதற்கான பரிந்துரைகள் வரவேற்கப்படுகிறது. எனவே, சமூக நீதிக்காக பாடுபட்டு பொதுமக்களின் வாழ்க்கைத் தரம் மேம்பட அவர்கள் மேற்கொண்ட பணிகள் மற்றும் எட்டிய சாதனைகள் ஆகியவற்றுடன் தகுதியுடையோர் தங்கள் விண்ணப்பத்தினை மாவட்ட கலெக்டருக்கு அனுப்பி வைக்கலாம். அதில் சுயவிவரம், முழு முகவரி, தொலைபேசி எண் மற்றும் சமூக நீதிக்காக பாடுபட்ட பணிகள் குறித்த விவரம் மற்றும் ஆவணங்கள் இருக்க வேண்டும். விண்ணப்பங்கள் டிச.20ம் தேதிக்குள் கிடைக்கும் வகையில் அனுப்ப வேண்டும். கூடுதல் விபரங்களுக்கு மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்தை தொடர்பு கொள்ளலாம்.

The post தந்தை பெரியார் விருதுக்கு விண்ணப்பிக்க அழைப்பு appeared first on Dinakaran.